Ağsuda imdad diləyən magistral yol - VİDEO

Çalaları “qreyder”lə qaşıyırlar - olmur! Çuxurlara çınqıl tökürlər – alınmır!..

Ağsu-Bico-Çöl Göylər magistral yolu Ağsu şəhərini rayonun Şərq və Cənub Şərq kəndlərilə əlaqələndirən əsas yoldur. 30 kilometrlik yol uzun müddət idi tam dağılmış vəziyyətdə qalmışdı. Təxminən, 7-8 il əvvəl yenidən bu yol asfaltlandı. Amma necə?..
Dağılmış yol əvvəlcə orta səviyyədə qazıldı, sonra bərkitmə işlərinə başlandı. Bərkitmə işləri uzun fasilələrlə bir ilə yaxın müddəti ətatə etsə də, tam başa çatmamış, Bakıdan rayon rəhbərliyinə göstəriş gəldi ki, tezliklə yol istifadəyə verilməlidir. (Yəqin, müddət çoxdan bitibmiş). Göstəriş hansı səviyyədə və tonda gəlmişdisə, bir həftə ərzində yol bir neçə santimetr qalınlığı olan asfatla tezbazar örtüldü. İki böyük körpü və bir neçə su keçidi dəyişilmədən üstü asfaltlandı. Ərazi maili olduğundan, dağ yamaclarından axıb gələn suları yoldan ötürmək üçün beton keçidlər yerləşdirilməli idi, lakin vacib keçidlərin bir neçəsi qoyulsa da, bir neçə əhəmiyyətli yerlərə su keçidi yerləşdirilmədi.
Bütün bu nöqsanların nəticəsində, bir il ötər-ötməz, yolda çökmələr, qırışlar əmələ gəlməyə başladı. Və vaxt ötdükcə, taa bu günə qədər – 7-8 ilin ərzində Ağsu-Bico-Çöl Göylər yolu, demək olar, tamamilə dağılıb-töküldü. Hazırda, avtomobillər həmin yolun verdiyi işgəncələrdən dözülməz sarsıntılar yaşayırlar. Xam sürücülərsə bəzən qəza hallarından güclə qurtula bilsələr də, həmişə buna nail ola bilmirlər. Yaxın keçmişdə Gəgəli kəndinin alaqapısının (giriş qapısı) qarşısındakı çala-çökəkdən qaçmaq istərkən çevrilən maşını misal çəkmək olar. Xüsusən axşam və gecə saatlarında bu yolda icazə verilən sürətlə avtomobil idarə etmək çox təhlükəlidir. Acınacaqlı vəziyyəti yol idarəsinin və rayonun rəhbərliyi tez-tez görsələr də, əncam çəkmək barədə, hələ ki, düşünən görünmür.
Amma Ağsu rayonunun Yol idarəsinin əməkdaşları bir neçə dəfə maraqlı üsulla çala-çökəkləri “təmir etməyə” təşəbbüs göstəriblər – dərin çalalara şeben (doğranmış xırda daş) töküblər. Xırda daş maşın təkərlərinin altından ləzzətlə vızıldayıb çıxır axı!.. Yol işçiləri bir dəfə də bir neçə çalaya atsep-sement qarışdırıb veriblər, sağ olsunlar! Amma onların günahı deyil ki, bu sayaq yamaq çox tez dağılır... Bir yol idarəsinin işçiləri ki, asfat yolda yaranmış çala-çuxurları, qırışları-damarları “qreyder” texnikası ilə hamarlayırlar, onları dağılmış yollara görə qınamaq, - insafsızlıq olar. Günah yoldadır! Niyə dağılır ki, niyə də imdad diləyir?!. Ancaq elə bir reallıq var ki, onu nəzərə alanda, yolun özünü də günahlandırmaq olmaz: Gecə yarısından hava işıqlanana qədər həmin yolla ağır yük – tikinti materialları daşıyan ağır tonnajlı maşınlar yolu gecə də nəfəs almağa qoymadıqlarından, asfaltın bağrı cadar-cadar, çatlaq-çatlaq olmağa məhkumdur! (Həmin yük maşınlarına, el yatandan sonra, kimlərin niyə və nəyin müqabilində, qədərdən artıq yük daşımalarına icazə vermələri camaat üçün sirdir!)
Çox qəliz hal yaranıb –nə camaatın özünün imkanı yoxdur ki, yolu təmir eləsin, nə də camaat bu işdə də əlini göyə açıb Allahdan kömək istəyə bilmir, çünki Allahın asfalt zavodu, asfatbasan maşınları yoxdur!.. Məsələnin həlli “insaf”a qalıb, İNSAFa!!!

Qarşı tərəflərin məsuliyyətli şəxsləri, buyursunlar, münasibət bildirsinlər, dinləyək!

BAMƏZƏ