Ağsuda işıq verilişində böhran yaranıb

Ağsu rayonunun kəndlərinə elektrik enerjisinin verilişi bu gün səhər saatlarından dayandırılıb.

Becan.az xəbər verir ki, səhər saat 7-8 arası Ağsu rayonunun "Cəfərli" və "Ləngəbiz" xətlərinin üzərində yerləşən kəndlərin işıqları Ağsu Rayon Elektrik Şəbəkəsi tərəfindən söndürülüb. Hava şəraitinin küləksiz, yağışsız, tufansız - sakit olmasına baxmayaraq, kəndlərin işıq təminatında böyük fasilə yaranıb.

Elektrik şəbəkəsi ilə əlaqə yaradıb, böhranın səbəblərini öyrənmək cəhdlərimiz baş tutmadı. Sadəcə, "Ləngəbiz" xəttinin sahə rəisi ilə əlaqə yarada bildik. Onun "işıqların söndürülmə səbəbi nədir" sualına cavabı belə oldu: "İşıq idarəsi ilə əlaqə saxlamışam. İdarədən bildirdilər ki, işləyirik, yanacaq. Amma vaxtını demədilər".

Qeyd edək ki, Ağsu rayonunda, xüsusilə kəndlərində işıqların böyük fasilələrlə verilməsi çoxdandır adi hal alıb. Çünki kəndlərin çoxunda işıq xətləri istismar müddətini xeyli illər əvvəl başa vurub. Xətlər yenilənmədiyindən, sakit havalarda belə, kəndlərə elektrik enerjisi verilişində fasilələr yaranır.

***
Qeyd: Nəzərinizə çatdıraq ki, yazı yayımlanandan bir neçə dəqiqə sonra "Ləngəbiz" xətti üzrə işıq verilişi bərpa edildi. Lakin enerjinin verilməsində yaranan 4 saatlıq böhranın səbəbi qaranlıq olaraq qaldı.