Daha bir beynəlxalq yarış - BAKIDA

Bakıda Ümummilli Lider Heydər Əliyevin 100 illiyinə həsr edilmiş daha bir yarışa start verilir.

Bu məqsədlə Zirə Mədəniyyət Mərkəzi – Eko Parkda baş tutacaq “Ironwind” beynəlxalq idman yarışı ilə bağlı mətbuat konfransı keçirilib.

Yarışda iştirak edən idmançılar əvvəlcə Pirallahı rayonunda tədbirin keçiriləcəyi məkanla tanış olub, onlara məşq etmək üçün şərait yaradılıb, yarış nömrələri göstərilib.

Konfransda Azərbaycan Triatlon Federasiyasının (ATF) vitse-prezidenti Rüfət Həsənov, idman direktoru Elvin Məmmədxanov, idmançılar və media nümayəndələri iştirak edib.

Mətbuat konfransı Ümumilli Lider Heydər Əliyevin 100 illik yubileyinə həsr olunmuş videoçarxla başlayıb.

Tədbirdə çıxış edən ATF-nin idman direktoru
Elvin Məmmədxanov Heydər Əliyev ili çərçivəsində keçirilən yarışlardan, həmçinin Ulu Öndərin idmana olan diqqətindən danışıb.

ATF-in vitse-prezidenti, “Triterra” triatlon klubunun rəhbəri və yarışın direktoru Rüfət Həsənov “Ironwind”in açıq turnir olduğunu diqqətə çatdırıb. Yarışa xarici ölkələrdən qatılan idmançılara yaradılan şərait barədə danışıb.
“Triterra” klubunun baş məşqçisi Aleksandr Mordasov distansiyalar haqqında informasiya verib.

Qeyd edək ki, Gənclər və İdman Nazirliyi, Azərbaycan Triatlon Federasiyası, Baku City Circuit və “Triterra” klubunun birgə təşkilatçılığı ilə 2023-cü il iyunun 4-də Bakının Pirallahı rayonunda yerləşən Nərəkənd parkında Ümumilli Lider Heydər Əliyevin anadan olmasının 100 illik yubileyinə həsr olunmuş “Ironwind” açıq turniri keçiriləcək.

Triatlon turnirində 1,9 km məsafəyə üzmə, 90 km məsafəyə velosiped sürmə və 21,1 km məsafəyə qaçış mərhələsi olacaq. Türkiyə, Rusiya, İran, Böyük Britaniya, ABŞ, Kipr, Xorvatiya, Qazaxıstan, Ukrayna, Belarus və digər ölkələrdən idmançıların qoşulacağı yarışda ümumilikdə 100-dən çox iştirakçı qüvvəsini sınayacaq. Turnir zamanı Nərəkənd parkında aşağı yaş qruplarının da nümayiş üçün dairəvi qaçışı nəzərdə tutulub.

Yarışın qalibləri üçün nəzərdə tutulan pul mükafatlarının məbləği də açıqlanıb. Kişilər və qadınlar arasında 1-ci yerin sahibinə 2.000 AZN, 2-ci yeri tutanlara 1.000 AZN, finişə 3-cü çatan idmançılara isə 500 AZN, həmçinin sponsorlardan hədiyyələr təqdim olunacaq.

Yarış “PMD”, “ALUFAR”, “METAK”, “NAR MOBILE”, “BONAQUA” və “SMARTSCORING” şirkətlərinin sponsorluğu ilə baş tutacaq.


Becan.az