Ağsuçay quruyub - VİDEO, FOTO

Avqust ayının çox isti və quraq keçməsi mənbəyini Böyük Qafqazın hündürlüyü dəniz səviyyəsindən 2268 metr olan Sarıbulaq dağından götürən Ağsuçayın şəhərin mərkəzindən keçən hissəsində qurumasına səbəb olub. Bildirək ki, belə hal müxtəlif illərin yay fəsillərində artıq baş verib, yəni, birinci dəfə deyil.

Becan.az xəbər verir ki, əsasən təsərrüfatların suvarılmasını və Cavanşir su anbarının qidalanmasını təmin edən Ağsuçayın avqust ayının ikinci yarısında quruması elə də ciddi problem deyil. Çünki Ağsu rayonu ərazisində Ağsuçay vasitəsilə suvarılan taxılçılıq təsərrüfatlarının əksəriyyətində hazırda dinc dövrdür. Suvarılmaya ehtiyacı olan bağ-bostan, qarğıdalı, soya, üzüm kimi məhsulların suvarılması, bəzi yaşayış məntəqələrinin təsərrüfat suyuna olan təlabatı isə Cavanşir su anbarının ehtiyatında olan su ilə, Girdimançay və Yuxarı Şirvan Kanalından qidalanan su kanalları vasitəsilə həyata keçirilir.

Qeyd edək ki, yay fəslinin ömrü tükənməkdə, payız fəsli yaxınlaşmaqdadır. Digər tərəfdən, hidrometeoroloji proqnozlara əsasən, ölkə, eləcə də Dağlıq Şirvan ərazisində bir neçə gündən sonra yağışlar yağacağı gözlənilir ki, bu da narahatçılığa əsas olmadığından xəbər verir.