Bu gecə qar yağacağı gözlənilir

Əvvəlcədən xəbər verildiyi kimi, şimal-qərbdən hərəkət edən soyuq hava kütlələrinin təsiri nəticəsində ölkə ərazisində yağıntılı, küləkli hava şəraiti müşahidə olunur.

Bu barədə Milli Hidrometeorologiya Xidmətinin Hidrometeoroloji Proqnozlar Bürosunun direktoru Gülşad Məmmədova deyib.

O bildirib ki, küləyin maksimal sürətinin bəzi yerlərdə 27-32 m/san-dək çatacağı gözlənilir. Havanın temperaturu ötən günlərlə müqayisədə 5-8 dərəcə aşağı enəcək.

Bakıda və Abşeron yarımadasında da yağıntılı hava şəraiti dekabrın 18-i səhərədək davam edəcək. Bəzi yerlərdə intensiv olacağı, dekabrın 17-i gecəyə doğru, 17-dən 18-ə keçən gecə və səhər saatlarında bəzi şəhərətrafı ərazilərdə yağışın sulu qara keçəcəyi ehtimal olunur. Güclü küləkli hava şəraiti dekabrın 18-i səhər saatlarından tədricən mülayimləşəcək.

Bölgələrdə də yağıntılı, küləkli hava şəraiti dekabrın 18-i səhərədək davam edəcək.

Bəzi yerlərdə qar yağacaq, ayrı-ayrı yerlərdə, əsasən Naxçıvan Muxtar Respublikası, Qarabağ və Şərqi-Zəngəzur bölgəsində, Balakən, Şəki, Quba, Xaçmaz, Lənkəran, Astara zonasında yağıntıların intensiv olacağı ehtimal olunur.

Dekabrın 18-i gündüz saatlarından Bakıda və Abşeron yarımadasında və bölgələrdə hava şəraitinin nisbətən sabitləşəcəyi gözlənilir.

Dekabrın 19-u və 20-də ölkə ərazisində havanın mülayim, əsasən yağmursuz keçəcəyi proqnozlaşdırılır. Mülayim cənub-şərq küləkləri üstünlük təşkil edəcək.

Becan.az