Göyçayda qalmaqal: Kənd sakini həm söyüldü, həm də həbs edildi

Göyçay rayonunun Ərəbcəbirli kənd sakini Əziz Sadəddin oğlu Xasıyevin kənd ərazi vahidliyi üzrə icra nümayəndəsi Nazim Həşimov tərəfindən incidildiyi, təhqir olunduğu bildirilir.

Bu barədə sosial şəbəkələrdə məlumat və videomateriallar paylaşılıb.

Video çəkilişdən əldə olunan məlumata görə, leysan yağışlardan yaranan sel suları Ərəbcəbirli kənd sakini Sadəddin Xasıyevin həyətyanı sahəsinə ciddi ziyan vurub. Bu səbəbdən S.Xasıyev mətbuat vasitəsilə aidiyyatı dövlət qurumlarından köməklik istəyib. Bundan sonra icra nümayəndəsi ilə zərərçəkmişin oğlu arasında qalmaqallı mübahisə yaranıb...

Əziz Sadəddin oğlu Xasıyevin "youtube" kanalına yerləşdirilmiş videodakı danışığından belə aydın olur ki, atası Sadəddin Xasıyevin mətbuata müraciəti icra nümayəndəsi Nazim Həşimovun "xoşuna gəlməyib" və nəticədə kəndin rəhbəri avtomobilini şikayətçinin ünvanına sürüb. İyul ayının 31-də baş tutan görüş mübahisəyə çevrilib və anlaşma olmayan dialoqun sonluğu icra nümayəndəsi Nazim Həşimov tərəfindən qarşı tərəfin ünvanına söyülən küçə söyüşlərilə yekunlaşıb.

Kadrlardan göründüyü kimi, çəkiliş aparıldığına görə hövsələdən çıxan icra nümayəndəsini avtomobildə yanında əyləşən digər şəxs sakitləşdirməyə çalışır və üstəlik "ayıbdı" iradını da bildirir. Çəkilişdə o da görünür ki, abırsız söyüş söyülərkən orada qadın da var.

Təhqir olunan Əziz Xasıyev danışığında bildirir ki, icra nümayəndəsinin nalayiq hərəkətilə bağlı artıq Dövlət Başçısına və rayon rəhbərliyinə müraciət göndərib. Lakin sosial şəbəkələrdə yayılan yeni məlumata əsasən, ailə-uşağının yanında təhqir olunan Əziz Xasıyev sonradan Göyçay RPŞ-nin əməkdaşları tərəfindən həbs edilib.

Qarşı tərəfin söz haqqını tanıyırıq.



S.ƏHMƏD
Becan.az