“Nəcməddin Sadıkov mühakimə edilməlidir”

“Belə bir ifadə var ki, gedənin dalınca danışmazlar. Amma bizdə gedənin daha çox tumarlanması prosesi baş verir”.
Bunu bir neçə gün əvvəl deputat Fazil Mustafa bildirib.
O xatırladıb ki, bu günlərdə Azərbaycan müdafiə nazirinin sabiq müavini, Müdafiə Nazirliyinin Baş Əməliyyat İdarəsinin sabiq rəisi, general-mayor Elbrus Orucov müsahibə verib: "O, Azərbaycan Ordusunda kifayət qədər başqa ölkələrin, xüsusilə Rusiya xüsusi xidmət orqanlarının agenturasının mövcud olduğunu bildirib. Hətta, birbaşa keçmiş Baş qərargah rəisi Nəcməddin Sadıkovu suçladı. Əməliyyat planlarının satılması, müxtəlif əməliyyat proseslərinin pozulması istiqamətində açıqlama verdi. Hüquq-mühafizə orqanları açıq-aşkar Nəcməddin Sadıkovu mühakimə etməlidirlər. Onun mühakiməsi ona görə vacibdir ki, günahsız ölən əsgər və zabitlərimizin ölümündən sonra haqqını qaytara bilək. Bu proseslərə məsuliyyətli yanaşmalıyıq".
Fazil Mustafa qeyd edib ki, bu proseslərə daha məsuliyyətli yanaşılmalıdır: “Ordumuzun təmizlənməsi istiqamətində işlərə baxmalıyıq”.
Millət vəkili qeyd edib ki, Türkiyədə keçirilən “Vətən savaşının tarixi: Şəxsiyyət faktoru” mövzusundakı tədbirdə əməliyyatdan öncə Ali Baş Komandana Şuşanın azad olunması planı təqdim edilsə də, o, bunu geri çevirərək özünün Şuşa ilə bağlı planını verib: “Aydın olur ki, Şuşanın azad olunması həm də hərbçi kimi İlham Əliyev zəkasının məhsuludur. Kaş ki, Aprel döyüşlərində də bu planları geri çevirərdi. İnformasiyası vaxtında olsaydı, Tərtər hadisələrində də geri çevirərdi. Bu geri çevrilməyən planlar yüzlərlə Azərbaycan əsgər və zabitinin həyatı bahasına başa gələn, xüsusi təyinatlıların məhvinə gətirib çıxaran planlar olub”.
Eldar Tanrıverdi