Ağsuda da Novruz bayramı milli ruhda keçirilir

Xalqımızın milli və ən əziz bayramı olan Novruzun gəlişi Ağsu rayonunda da təntənəli şəkildə qeyd edilib. Bu barədə Ağsu RİH-nin rəsmi səhifəsində məlumat paylaşılıb.

Tədbir günü rayon rəsmiləri, şəhid ailələri, Vətən müharibəsi qaziləri, iştirakçıları və ictimaiyyət nümayəndələri bayram əhvalına uyğun bəzədilmiş Ağsu şəhərindəki Bayraq meydanına toplaşıblar. Şənlik mərasimində gənc rəsm həvəskarlarının Novruz gözəlliklərini əks etdirən tabloları, xalqımızın milli musiqi alətlərinin, adət-ənənə nümunələrinin, eləcə də milli geyimlərin sərgiləri və nağaraçıların nümunəvi çıxışları seyrçilər tərəfindən böyük maraqla qarşılanıb.

Bayramsayağı bəzədilən meydanda Novruzun müstəqillik dövründə daha coşqu və təmtəraqla qeyd olunduğu diqqətə çatdırılıb. Milli adət-ənənələrimizin özümüzə qaytarılmasında, milli bayramlarımızın dövlət səviyyəsində qeyd edilərək, ümumxalq bayramı səviyyəsinə qaldırılmasında Ümummilli lider Heydər Əliyevin, onun siyasi varisi Prezident, cənab İlham Əliyevin böyük xidmətləri vurğulanıb.

Sonra bir-birini əvəz edən rəngarəng musiqi nömrələri, balacaların rəqsləri, Kosa və Keçəlin şən zarafatları, ədəbi-bədii səhnəciklər iştirakçılarda xoş təəssüratlar yaradıb.

Tədbirin sonunda ənənəvi Novruz tonqalı yandırılıb.


Becan.az