Deputatdan maaş və pensiya artımı ilə bağlı açıqlama: 900 manat...

"2023-cü ilin ikinci yarısında Azərbaycanda orta aylıq əmək haqqı 900 manata çata bilər”.

Bunu Qaynarinfo-ya açıqlamasında Milli Məclisin deputatı Vüqar Bayramov Prezident İlham Əliyevin yerli televiziya kanallarına müsahibəsində bildirdiyi "Bu il Azərbaycanda orta aylıq əməkhaqqı 900 manat olacaq” fikirini şərh edərkən deyib.

Deputat bildirib ki, ötən ilin ilk 10 ayının yekunlarına görə Azərbaycanda orta aylıq əməkhaqqı 828 manata çatıb: "Bu təxminən əvvəlki ilə müqayisədə 4,5% artım deməkdir. Artıq minimum əməkhaqqında da artımlar həyata keçirilib. 15% minimum əməkhaqqının artırılması artıq yanvar ayından etibarən reallaşdı. Bütövlükdə, ilin sonuna kimi Azərbaycanda orta aylıq əməkhaqqının 900 manata çatacağı gözlənilirdi.

Amma həm minimum əməkhaqqında olan artımlar, həm Vahid Tarif Cədvəlinə uyğun olaraq digər sektorda çalışanların əməkhaqqlarındakı artımların həyata keçirilməsi nəticəsində gözlənilir ki, 2023-cü ilin ikinci yarısında Azərbaycanda orta aylıq əməkhaqqının 900 manata çatması mümkün ola bilər”.

Qeyd edək ki, Prezident İlham Əliyev yerli televiziya kanallarına müsahibə verib. Prezident müsahibəsində "Bu il Azərbaycanda orta aylıq əməkhaqqı 900 manat olacaq”, deyə bildirib.

Bahar Rüstəmli