Novella Cəfəroğlu: "Hər iki tərəf düzgün etməyib"

"Məsələyə geniş baxanda görünür ki, sanki onları kimsə öyrədib ora çıxarıb".

Bunu açıqlamasında hüquq müdafiəçisi Novella Cəfəroğlu dünən Gədəbəydə kənd sakinləri ilə polis arasında olan insident haqda danışarkən deyib.

Novella Cəfəroğlu bildirib ki, bu hadisəyə görə aidiyyatı qurumların hamısı məsuliyyət daşıyır:

“Orada polisin davranışı düzgün deyildi. Orda bir ağıllı adam yox idi ki, bu hadisənin qarşısını alsın? Elə bil bu hadisəni qəsdən ediblər ki, sabahısı gün ölkəyə qarşı istifadə olunsun. Polisin sakinlərlə davranışını çox pisləyirəm. Bu, doğrudan da biabırçı görüntüdür. Biz lazımı orqanlarla danışdıq. Onlar dedi ki, araşdırma gedir. Hər halda qadınlara qarşı o cür münasibət göstərmək düzgün deyildi. Polisdən bildirilib ki, araşdırılıb lazımi cəza veriləcək. Mən polisi müdafiə etmirəm. Amma qarşı tərəf də nəyə getdiyini, necə getdiyini fikirləşməli idi. Hər iki tərəfdən düzgün hərəkət deyildi. Danışmağı, dialoqa girməyi bacarmırıq. İcra hakimiyyəti bu gün gəlib orda etirazçılarla danışıb. İcra hakimiyyəti ora indi yox, daha əvvəl getməli idi. Etirazçılar da daha əvvəl icra orqanına müraciət etməli idilər. Əgər müraciət olunubsa, araşdırılsın ki, niyə aiddiyyatı qurumlar tədbir görməyib"?

Novella Cəfəroğlu Hüquq Müdafiə Təşkilatları Monitorinq Qrupunun hadisə ilə bağlı araşdırma apardığını bildirib:

"Kənd sakinlərinin etirazı vardısa, birinci icra başçısına, polisə, Ekologiya Nazirliyinə müraciət etməli idilər. Yeri gələndə bu problemi qəzetlərdə, xəbər saytlarında ictimailəşdirə bilərdilər. Niyə lazimi orqanlara müraciət etməyiblər, niyə problemi işıqlandırmayıblar? Vətəndaşların hüququ var axı, problemi işıqlandırsınlar və aidiyyatı qurumlar bu işə baxsın. Heç bir şey etmədən çıxıblar aksiyaya. Sakinlər polis gələndə söz ilə problemi başa salmalı idilər. Kişilər çıxıb qabağa sözlərini deməliydi. Əllərində kağız varsa, onu təqdim edə bilərdilər. Millət bu cür məsələlərdə həssas olmalıdır. Etiraz zamanı kəndin kişiləri harda idi və polisin qabağına niyə məhz qadınları göndərmişdilər? Kənd sakinləri etirazlarını başqa formada edə bilərdilər. Bizə belə bir hadisənin baş verməsi lazım deyildi”.

Hüquq müdafiəçisinin sözlərinə görə, ermənilər bu hadisədən bizə qarşı istifadə edəcək:

“Avropa Şurasında Laçın yolu, Zəngəzur koridoru məsələsi qaldırılıb. Bunlar bizim üçün çox mühimdir. Biz Laçın yolunda 46 gün dayandıq ki, ermənilər bizim ekologiyamızı məhv edirlər. Sabah bu məsələni ermənilər bütün dünyaya bar-bar bağıracaqlar. Deyəcəklər ki, bunlar öz camaatını qırırlarsa, görün, bizim başımıza nə oyun gətirərlər. Azərbaycanı niyə pis vəziyyətdə qoyursuz? Hər addımımızı ciddi-ölçüb biçməliyik”.
(Bakupost)