Ekspert rəyi: Siqaret və spirtli içkilər bahalaşa bilər

Məlum olduğu kimi, Vergi Məcəlləsinə təklif olunan dəyişikliyə əsasən, siqaret və alkoqollu içkilərin aksiz dərəcəsi artırılır.

Belə ki, aksiz dərəcəsi siqarillanın hər 1000 ədədi üçün 43 manatdan 45,5 manata, tütündən hazırlanan siqaretlər və onların əvəzedicilərinin hər 1000 ədədi üçün 38,5 manatdan 45,5 manata yüksəldilir. Hazırda aksiz dərəcəsi qızdırılma nəticəsində istehlak edilən (buxar) tütün və tütün məhsullarının hər 1000 ədədi üçün 14 manatdırsa, layihəyə görə, alışdırılmadan nəfəsə çəkmək üçün nəzərdə tutulmuş, tərkibində tütün olan məhsulların hər 1000 ədədi üçün 16 manat olacaq.

Məsələyə münasibət bildirən iqtisadçı ekspert Fuad İbrahimov deyib ki, əgər aksiz dərəcələri cüzi qalxırsa, bu, məhsulların qiymətinə də cüzi təsir etməlidir. Lakin bizdə əksi baş verir:


“Aksiz dərəcələrinin artmasını bahanə edən sahibkarlar dərhal məhsulun qiymətini qaldırırlar. Hər 1000 ədəd siqaret üçün aksiz dərəcəsi 38,5 manatdan 45,5 manata yüksəldilirsə, bu, o deməkdir ki, məhsulun qiymətində 4 qəpik bahalaşma olmalıdır. Amma bizim sahibkarlar aksiz dərəcəsinin artdığını bəhanə edib qiyməti 2 manat bahalaşdırırlar. Bu da monopoliyanın nəticəsidir. Spirtli içkilərlə bağlı da eyni vəziyyətdir. Aksiz dərəcəsinin artması 1 litrdə 80 qəpik fərq edir. Amma bizdə qiyməti 4-5 manat qaldırırlar. Sahibkarlar siqaret və ya spirtli içkilərin qiymətini vətəndaşın sağlamlığını düşündüyü üçün deyil, daha artıq qazanc əldə etmək üçün qaldırırlar. Aksiz dərəcələrinin qaldırılmasından sahbkarlar öz xeyirlərinə sui-istifadə edirlər”.(Bakupost.az)