Rusiya Ukraynanın bu ərazilərindən imtina etməyə razıdır

ABŞ Prezidenti Donald Tramp 15 avqustda rusiyalı həmkarı Vladimir Putinlə keçiriləcək görüşdə Ukrayna əraziləri məsələsini müzakirə etməyəcək.

Xəbər verilir ki, bu barədə “NBC News” və “CNN”ə danışan məlumatlı mənbələr məlumat verib.

Onların sözlərinə görə, Tramp ötən gün Ukrayna Prezidenti Volodimir Zelenski və Avropa liderləri ilə keçirdiyi onlayn konfrans zamanı bildirib ki, o, şərtsiz atəşkəsə nail olmağa çalışır.

Bununla yanaşı, Ağ Ev rəhbəri və Avropa liderləri bu qənaətə gəliblər ki, sülh danışıqları yalnız atəşkəs əldə olunduqdan sonra başlaya bilər və Ukrayna ərazilərin gələcəyi və sülh şərtlərinin müəyyən edilməsində mütləq iştirak etməlidir.

ABŞ Prezident Administrasiyasında çalışmış adının çəkilməsini istəməyən bir məmur “CNN”ə bildirib ki, Tramp müttəfiqləri öz tərəfində saxlamağa üstünlük verir, lakin Putinlə görüşdə hər şey baş verə bilər.

Onlayn konfrans zamanı, əgər Tramp və Putin arasında danışıqlar istənilən kimi keçməzsə, Rusiyaya qarşı yeni məhdudiyyətlər və onun ticarət tərəfdaşlarına qarşı ikinci dərəcəli sanksiyaların tətbiqi də müzakirə edilib. Lakin Tramp bu barədə heç bir vəd verməyib.

Eyni zamanda, danışıqlar uğurla nəticələnərsə, Tramp Ukrayna Prezidenti Volodimir Zelenskinin də iştirak edəcəyi üçtərəfli görüşün artıq gələn həftə keçirilə biləcəyini istisna etməyib.

“Wall Street Journal”ın mənbələri isə iddia edir ki, Putin Sumı, Xarkov və Dnepropetrovsk vilayətlərindəki ərazilərdən imtina etməyə hazırdır, lakin bunun əvəzində ABŞ-nin onun artıq Rusiya torpağı elan etdiyi əraziləri rəsmi şəkildə tanımasını istəyəcək.

Xatırladaq ki, Tramp və Putin 15 avqustda Alyaskada görüşəcəklər.

Becan.az