Köçkünlər qayıtmaq istəmir, yoxsa?..

Elşən ƏLİSOY







Son günlər yenə də məcburi köçkünləri hədəfə gətirməklə cəmiyyətdə ikitirəlik salmağa çalışırlar. Vətənşüvənlər illərdir ki, doğmalaşmış, qohumlaşmış insanlar arasında yaranan mənəvi bağlığılı ağır və güllə yarasından da ağrılı sözlərlə zədələyir, köksümüzə ağır zərbə vururlar. Adam bəzi yazılan səviyyəsiz yazıların və videoların altında yazılan şərhləri oxuyanda, "bircə cəhənnəm olub xarabamıza gedə bilsəydik" deyə, düşünür. Çox ağır bir situasiya yaranıb. Nə edək?..

Baxaq, görək, işğal olunmayan rayonlardan gedənlər rayonlarına, kəndlərinə qayıdırlar?

Ölkədə yaranan ağır iqtisadi-sosial problemlərlə bağlı bir tikə çörək üçün evini-eşiyini buraxıb Bakıya və Azərbaycandan kənara gedən milyonlarla insan var ki, illərlə ailəsinin uşağının yanına gələ bilmir və bunların böyük əksəriyyəti məcburi köçkün deyil. Gənclər, ümumiyyətlə, rayonları tərk edirlər. Bölgələrimizdə acınacaqlı vəziyyət yaranıb. Kəndlərimizin bir çoxuna gedəndə söz soruşmağa adam tapa bilmirsən. Kəndlər sürətlə boşalır. Gedənlər qayıtmır. İşğal olunmayan rayonlar Vətən deyil bəyəm?! Nə isə... Bu barədə danışılası söz çoxdur.

Görək, məcburi köçkünlər torpaqlarına qayıtmır, yoxsa, qaytarılmırlar?

Torpaqlarımızın azad edilməsindən 5 il keçsə də, bərpa və quruculuq işləri yetərli şəkildə getmir. İşğaldan azad olunmuş ərazilərimizə 5 ildə cəmi 15 minə yaxın adamın köçürüldüyü bildirilir. Bu az sayda köç insanların geri qayıtmaq istəməməsi ilə yox, dövlət səviyyəsində qayıdış planının gecikdirilməsi və daha doğrusu, bilərəkdən qayıdışa maraq göstərilməməsi ilə bağlıdır. İşğaldan azad edilən ərazilərdə əkin sahələri məmurlar tərəfindən kütləvi şəkildə zəbt olunub. Gəlir gətirən sahələr yenə də məmurlar və onların qohum-əqrabaları tərəfindən mənimsənilib. Qayıdan sakinlərə ailələrini dolandırmaq üçün heç bir gəlir sahəsi buraxmayıblar. İnsanlar ailələrinin ehtiyaclarını qarşılaya bilmir.

Şəxsən mən və mənim kimi minlərlə insan torpaqlarımıza qayıtmaq üçün müraciət etmədiyimiz ünvan qalmayıb. Cavab verən belə yoxdur.

Şəhidlərimizin adı ilə manipulyasiya edən yalançı vətənpərvərlərə başa salmaq lazımdır ki, o torpaqların sakinlərinə dünyadan köçənlərini öz ata-baba qəbristanlığında dəfn etməyə belə icazə vermirlər. Hansı haqla məcburi köçkünlər qayıtmaq istəmir deyirsiniz?!.

Hazır evlərimizi trakorun qabağına verib yerlə bir etdilər. Halbuki köçkünlər dövlətdən heç nə istəmirdi. Tək istədikləri, "imkan verin, öz evimizi bərpa edək" tələbi idi.

İşğaldan azad edilmiş rayonlarımız çox dəhşətli şəkildə korrupsiya yuvasına çevrilib. Milyardlarla vəsait vəhşicəsinə talan edilir. Talan edilən vəsait tək məcburi köçkünlərindir bəyəm? Dövlətin büdcəsidir. Yalançı vətənpərvərlikdənsə, doğru vətəndaş olub, bunları tələb edin də. Etmirsiniz, çünki qarşınızda köçkün yox, çəkindıyıniz qüvvələr var.

Köçkünləri ittiham edən vayşüvənlərə məsləhət görərdim ki, həftənin istənilən iş günündə Qaçqınların və Məcburi Köçkünlərin İşləri üzrə Dövlət Komitəsinin (qaçqınkom) binasına getsinlər. Nə vaxt getsələr onlarla insan görəcəklər ki, doğma torpaqlarına qayıtmaq üçün müraciət edirlər.

Bir məsələni də bildirmək istəyirəm. Hər yerin yaxşısı da var, pisi də. Bir elə, obaya qiymət verəndə oranın pisi ilə yox, yaxşıları ilə qiymət vermək lazımdır. Üç-dörd nəfər pisə görə o boyda insanları ittiham etmək olmaz.

Qaldı əsas məsələ olan, yeri gəldi-gəlmədi qoyulan minnətlərə. Bizə heç kim minnət qoya bilməz! Şükürlər olsun ki, heç kimin çörəyini yeməmişik. Heç kimin hesabına yaşamamışıq. Hansısa ölkənin sərhədlərini keçib qaçqın olmamışıq. Bu Vətən bizimdir və Vətənin istənilən guşəsi bizim obamızdır, Vətənimizdir. Nə qazanmışıqsa öz əziyyətimizlə, zəhmətimizlə qazanmışıq. İşləmişik, çalışmışıq, əziyyət çəkmişik ki, kiməsə minnət borcumuz olmasın.

Qarabağa gəlincə, hər kəsin yaşamaq istədiyi bir cənnətdir. Gözəl təbiəti, təmiz havası, təmiz bulaqları olan bir yerdə kim yaşamaq istəməz ki?!.

Sonda tam səmimi şəkldə deyirəm. Qapımız hər kəsin üzünə açıqdır. O yerlərə qonaq gələnlər istənilən insanın qapısını ərklə döyə bilər, hətta, yazılan yazıların, paylaşılan qərəzli videoların altında başqa yerdə bizimlə görüşüb-öpüşən, orda ürəyimizə yara vuran şərhləri yazan tanıdıqlarımız da.