"Media haqqında" Qanuna dəyişiklik edilməlidir!.. - ÇAĞIRIŞ

"Media haqqında" Qanunun qısa müddətdə tətbiqi ilə ortaya bir sıra ciddi problemlər çıxarmış oldu. Ona görə də, hesab edirəm ki, "Media haqqında" Qanunun Media Reyestri ilə bağlı 8-ci fəslinə dəyişikliklər edilməlidir. Çünki bu bənd media işçiləri arasında ciddi diskriminasiyaya səbəb olur. Bu fəslin tələbinə uyğun olaraq, ancaq jurnalist, (özü də ali təhsil alan şəxs), redaktor və məsul redaktor Media Reystrindən keçə bilər.

Qeyd edək ki, fəaliyyət göstərən media orqanlarında təkcə jurnalist deyil, eyni zamanda digər texniki işçilər də çalışır. Onlayn mediada isə yük daha çox "admin" dediyimiz inzibatçıların üzərinə düşür. Bundan əlavə olaraq, media qurumlarının əksəriyyəti videoçarxlar hazırlayır və ya videogörüntülü yayımları olur. Orada isə operatorlar və videomontajçılar çalışır.

Digər bir məqam isə özünü jurnalistika sahəsində təsdiq edən xeyli sayda kollec, texnikum bitirmiş və ya bakalavr təhsili olmayan, yarımçıq ali təhsilli əməkdaşlar çalışır.

Müxtəlif media qurumlari ilə əməkdaşlıq edən, çalışan peşəkar jurnalistlər var ki, onlar da Reystrdən keçmədiyindən, jurnalistə şamil edilən hüquqlardan məhrumdur. Ümumiyyətlə, bu, absurd bir yanaşmadır.
Digər heç bir sahənin fəaliyyətini tənzimləyən qanunvericilikdə belə ayrı-seçkilik və "ağ-qaraya" bölmək yoxdur.

Qanunda digər müəddəalar, media orqanının qeydə alınması, onlara vəsaitin ayrılması və ayrılan vəsaitin günün tələbinə uyğun olması ilə bağlı çoxlu suallar da var və onlar da aradan qaldırılmalıdır.

Təklif edirəm ki, qanuna dəyişikliklə bağlı aidiyyatı qurumlar təkliflər hazırlayıb, Milli Məclisə təqdim etməlidir. Əks təqdirdə, zaman keçdikcə, qanunun yaratdığı bu əngəlliklər və diskriminasiya gələcəkdə ciddi narazıçılığa səbəb olacaq.

Mürtəza Bünyadlı - (DİA.AZ)