"NATO-nun təqaüdə çıxmaq vaxtıdır"

Rusiya Xarici İşlər Nazirliyinin sözçüsü Mariya Zaxarova bildirib ki, NATO alternativ güc mərkəzlərinin yaranmasının qarşısını almağa çalışaraq dünyanı daha təhlükəli etməyə çalışır. Onun sözlərinə görə, alyansın təqaüdə çıxma vaxtıdır.

Musavat.com Rusiya mediasına istinadla xəbər verir ki, Zaxarova NATO Şurasının bir gün əvvəl xarici işlər nazirləri səviyyəsində alyansın mövcud olmasının 74-cü ildönümünə həsr olunmuş iclasından danışıb:

“NATO-nun baş katibi Yens Stoltenberq alyansın qlobal rolu barədə getdikcə daha çox açıqlamalar verir. Əslində, regional təhlükəsizlik sistemlərinin qurulmasında NATO mərkəzli yanaşmaların geniş şəkildə tətbiqi üçün təməl qoyulur. Ona görə də Ukraynanı silahla təchiz etmək və onu Rusiya ilə müharibəni davam etdirməyə sövq etmək, Çinə hücumlar, Yaponiya və Cənubi Koreya ilə flört etmək Arktikanı hərbiləşdirmə planlarıdır”.

Onun fikrincə, “Qərbin hegemonluğunu sarsıtmağa” qadir olan alternativ güc mərkəzlərinin mövcudluğunun qarşısını almaq üçün hər şey edilir.

“Ümumiyyətlə, əminliklə demək olar ki, təhlükəsizlik və NATO bir araya sığmayan şeylərdir. Bu baxımdan, yalnız bir nəticə özünü göstərir - 74 yaşında Şimali Atlantika blokunun təqaüdə çıxma vaxtıdır ", - Zaxarova deyib.

Daha əvvəl departamentin rəsmi nümayəndəsi məlumat vermişdi ki, Qərb Ukraynaya silah verir, münaqişənin mümkün qədər uzun müddət davam etməsi üçün bütün planetdə muzdlular toplayır.