Tez parlayıb, əbədi yanan işıqlar – ŞƏHİDLƏR

Adı BƏXTİYAR idi, ruhu da bəxtiyar oldu


Şəhid valideyni, jurnalist və ictimai təşkilat nümayəndələrindən ibarət bir qrup ictimai fəal Qobustan rayonunun Nabur kəndində Şəhid Bəxtiyar Bayramşah oğlu Məmmədovun ailəsini ziyarət ediblər. Şəhid ailəsini ziyarət etməkdə məqsəd ailə ilə tanışlıq, onların qayğıları ilə maraqlanmaq və onları geniş oxucu auditoriyasına tanıtmaqdan ibarət olub.

Bu barədə məlumat verən ziyarətçilər, Şəhid Bəxtiyar Məmmədovun həyat və döyüş yolu ilə Şəhidin valideynlərinin, kənd ağsaqqallarının, qohum və qonşularının hekayələşmiş söhbətlərindən bir daha yaxından tanış olublar. Şəhidin ata və anası nə qədər kövrəlsələr də, fəxarətlə etdikləri söhbətləri bir tarixi qəhrəmanın obrazını canlandırıb ziyarətçilərin düşüncəsində. Bayramşah kişi igid oğlu Bəxtiyarın uşaqlıq xarakterlərindən, idmana həvəsindən, hərbçi olmaq arzularından və döyüş yollarından sinə dolusu danışıb.


Ağsaqqallar, qohum-qonşular da öz növbələrində Bəxtiyarın böyüdüyü mühitdən, yeniyetməlik, gənclik çağlarında hərtərəfli aktiv oğul olmağından, mehriban davranışlarından, el-obasına, vətəninə bağlılığından müxtəlif ibarələrlə bəhs ediblər və Nabur kəndinin bütün Şəhid balaları ilə qürur duyduqlarını məğrurluqla dilə gətiriblər.

Qeyd edək ki, Nabur qədim tarixə malik Azərbaycan kəndlərindən olmaqla yanaşı, həm də xalq yaradıcılıq ənənələrinin formalaşdığı və yaşadıldığı, istedadlı aşıqların, sənətkarların, ziyalıların yetişdiyi torpaqdı (bu barədə başqa yazımızda geniş bəhs etməyi planlaşdırırıq). Qəhrəmanımız da məhz belə bir yurdda ərsəyə yetib, sevdiyi hərbçi peşəsinə yiyələnib və Nabur oğlu olaraq Azərbaycan hərb tarixinə adını əbədi yazdırıb.

Valideynlərinin və ellilərinin etdikləri söhbətlər əsnasında ziyarətçilərin topladıqları Şəhid həyatının qısa məlumatlarını oxucularımızın da diqqətinə çatdırırıq:


Bəxtiyar Bayramşah oğlu Məmmədov 1996-cı ildə, avqust ayının 8-də Qobustan rayonunun Nabur kəndində anadan olub. 2002-ci ildə Əbülfət İbrahimov adına Nabur kənd tam orta məktəbinin 1-ci sinfinə qədəm qoyub, 2013-cü ildə isə həmin məktəbin 11-ci sinfini bitirib.

O, 2012-2014 illərdə “taekvondo” idman növü ilə məşğul olub və müxtəlif yarışlarda 1-ci və 2-ci yerlərə layiq görülb.

Bəxtiyar 02 oktyabr, 2014-ci ildə Qobustan RHK tərəfindən həqiqi hərbi xidmətə çağrılıb və daxili qoşunların “N” saylı hərbi hissəsində 2016-cı ilin aprel ayına qədər xidmət keçib. Elə həmin hərbi hissədə müddətdən artıq həqiqi hərbi xidmət hərbi qulluqçularının kursunu(MAHHXHQ) bitirərək, “çavuş” rütbəsiylə Xüsusi Təyinatlı Dəstədə xidmətini davam etdirməyə başlayıb. Hərbi xidməti boyunca Bəxtiyar döyüş hazırlığı təlimlərində sərrast atıcılığı, idman üzrə aktivliyi, fitri savadı və nümunəvi tərbiyəsi ilə həmişə fərqlənib və nümünə göstərilib.


2019-cu ilin iyun-avqust aylarında Türkiyə Cümhuriyyətində Jandarma Özəl Asayiş Komutanlığı (JÖAK) kursunu yüksək nailiyyətlərlə bitirib. 2020-ci ilin aprel ayında hərb sıralarından tərxis olunan Bəxtiyar Məmmədov, 2020-ci ilin avqust ayında yenidən Müdafiə Nazirliyinin nəzdində MAHHXHQ kursunda “tuşlaycı” vəzifəsinə sahiblənib. Daha sonra “N” saylı hərbi hissədə xidmətə başlayıb.

2020-ci ilin sentyabr ayında başlayan Vətən Müharibəsinə qoşulan Bəxtiyar, bir sıra qızğın döyüşlərin iştirakçısı olub. Əsasən Füzuli və Xocavənd rayonlarının düşməndən azad olunması uğrunda rəşadətlə döyüşən Bəxtiyar Məmmədov 2020-ci ilin oktyabr ayının 30-da qəhrəmanlıqla Şəhid olub.


Bəxtiyar Bayramşah oğlu Məmmədov ölümündən sonra Azərbaycan Respublikasının Prezidenti, Ali Baş Qəhrəman İlham Əliyevin müvafiq sərəncamlarına əsasən, “Vətən uğrunda”, “Füzulinin azad olunmasına görə” və
“Xocavəndin azad olunmasına görə” medalları ilə təltif edilib.

Valideynlərinə, el-obasına bol səbr diləyiylə, Qəhrəmanımıza Allahdan rəhmət diləyirik! Ruhu şad, məkanı cənnət olsun igid oğlumuzun!

Allah bütün Şəhidlərimizdən rəhmətini əsirgəməsin!

Becan.az