Ağsunun Bico kəndində "təmizlik aksiyası"na start verilib - FOTOLAR

Ağsu rayonunun Bico kəndində "abadlıq işləri" çərçivəsində kənd qəbiristanlığında bu gündən təmizlik işlərinə start verilib. Tədbir 3 gün davam edəcək.

Bu barədə məlumatı Becan.az-a Ağsu RİH başçısının Bico kənd ərazi vahidliyi üzrə nümayəndəsi Bəhlul Mahmudov verib.

Bəhlul Mahmudovun sözlərinə görə, kənd bələdiyyəsinin və icra nümayəndəliyinin təşəbbüsü ilə kənd məzarlığının kol-kosdan, alaq otlarından və tullantı əşyalardan təmizlənməsi həyata keçirilir:

"Bildiyiniz kimi, kənd məzarlığı da ümumi istifadədə olan məkanlardandır. Bu üzdən ərazinin həmişə səliqə-səhmanda qalması vacib məsələlərdəndir. Məzarlıq həm də kənar və açıq sahədə olduğundan, orada mövsümi yabanı bitkilər və alaq otları bitir. Eləcə də, xüsusən bayram günlərində əhali kütləvi şəkildə yaxınlarının qəbirlərini ziyarət edərkən, apardıqları plastik su qablarının və digər əşyaların ətrafa tullanması nəticəsində qəbiristanlığın ərazisi zibillənir. Nəticədə ərazinin, heç olmasa ildə bir dəfə, təmizlənməsinə ehtiyac yaranır. Biz də, kənd rəhbərliyi olaraq, bu vacib tədbiri həyata keçiririk".

"Təmizlik işlərinə, kənd rəhbərliyi ilə yanaşı, bir neçə sakin də könüllü olaraq qatılıb. Hələ təmizlik aksiyası 3 gün davam edəcək. Məzarlıq ərazisi böyük olduğundan, işlərin tez yekunlaşması baxımından, əlavə köməyə ehtiyac duyulur. Hələ birinci gündür işə başlamışıq, ola bilsin, kənd sakinlərinin çoxu tədbirdən xəbərsizdir. Yəqin ki, əhali saytınız vasitəsilə bu aksiyadan tam şəkildə xəbərdar olacaq. Arzu edirik ki, sabahdan əhalinin əksər qismi iməcilik şəklində bu aksiyaya qoşulsun. Çünki qəbiristanlıq hamınındır və hamının son ünvanı da buradır. Ən əsası, nəzərə alaq ki, bu qəbristanlıqda həm də müqəddəs şəhidlərimiz uyuyur",- deyə, icra nümayəndəsi fikirlərini tamamlayıb.





Becan.az