Şəkər tozunun bahalaşacağı gözlənilir

Məlum olduğu kimi, son günlər Azərbaycanda şəkər tozu qıtlığı yaşanır. Belə ki, paytaxtla yanaşı, regionlarda fəaliyyət göstərən əksər marketlərdə şəkər tozunun olmadığı bildirilir.

Mövzu ilə bağlı Bakupost.az-a danışan iqtisadçı ekspert Akif Nəsirli bildirib ki, demək olar, hər il yay mövsümündə ölkədə şəkər tozu qıtlığı yaşanır:

“Hər il yay aylarında sənaye üsulu ilə, həm də bəzi yerli təsərrüfatlarda, hətta evlərdə kompot bağlamaq, mürəbbə hazırlamaq prosesi gedir. Ona görə də şəkər tozu əhali tərəfindən kütləvi şəkildə alınır. Ola bilsin ki,​ mövsümlə əlaqədar əvvəlcədən lazımi qədər tədarük olunmayıb. Yaxın günlərdə şəkər tozunun alışa uyğun olaraq tədarükü təmin ediləcək. Amma çox güman ki, qiymətlər bir qədər artacaq”.


A.Nəsirli vurğulayıb ki, Azərbaycanda sahibkar qiymətləri yalnız dövriyyə ilə tənzimləyir. Dövriyyə azalanda qiymətlər sabitləşir. Dövriyyə çoxaldıqda isə qiymətlər artırılır:

"Bu, inhisarçı bazarın xüsusiyyətlərindəndir. Biz önümüzdəki günlərdə şəkər tozunun bollaşmasının və qiymətlərin artımının şahidi olacağıq. Tələb artıb, təklif sabit qalanda qiymət artır. Bizdə şəkər tozunun qiyməti 1 manat 80 qəpikdir. Yəqin ki, qiymət 1 manat 90 qəpiyə, 2 manata yüksələcək".

İqtisadçı ekspert Eyyub Kərimli də şəkər tozu qıtlığını mövsümlə əlaqələndirib:

“Meyvənin bol vaxtı olduğunu nəzərə alsaq, bu kimi məhsulların hazırlanıb, qışda satış üçün saxlanması da çox rast gəlinən məqamdır. Görünür, tələbat çox olduğundan marketlər şəkər tozunu müvafiq çəkilərə bölüb, qablaşdırmağı çatdıra bilmirlər və vitrində bu məhsullar yoxdur”.


Ekspertin sözlərinə görə, statistik göstəricilərə əsasən, bu ilin ilk üç ayında 10 min tondan çox şəkər tozu ixrac edilib və bu, ötən ilin müvafiq göstəricisi ilə müqayisədə təxminən 50 faiz çoxdur. Şəkər istehsalı daxili tələbatı ödəyir:

“Bu baxımdan hesab edirəm ki, şəkər tozunun qıtlığından söhbət gedə bilməz. Sadəcə kiçik çəkilərlə bağlı çatışmazlıqlar ola bilər. Bu, müvəqqəti haldır”.