Qubad İbadoğluna 4 aylıq həbs cəzası verilib

Bu gün Nərimanov Rayon Məhkəməsi müxalifətyönlü siyasətçi, Azərbaycan Demokratiya və Rifah Partiyasının rəhbəri Qubad İbadoğlunun barəsində 3 ay 26 gün müddətinə həbs qəti-imkan tədbiri seçib.

Bu barədə jurnalistlərə vəkil Zibeyd Sadıqova bildirib.

Onun sözlərinə görə, Qubad İbadoğlu özünü günahkar saymır. Müdafiə tərəfi məhkəmənin həbs qərarından apellyasiya şikayəti verəcək.

Bildirilir ki, istintaq Qubad İbadoğluna qarşı Azərbaycan Cinayət Məcəlləsinin 204.1-ci (satış məqsədilə istehsal, habelə saxta pul və ya xarici valyutanın alınması və ya satılması) maddəsilə irəli sürülmüş ittihamı 204.3.1-ci maddəyə (eyni hərəkətlər mütəşəkkil qrup tərəfindən törədildikdə) tövsif edərək ağırlaşdırıb. Əgər 204.1–ci maddə üzrə İbadoğlunu 5 ildən 7 ilədək azadlıqdan məhrum olunma təhlükəsi gözləyirdisə, 204.3.1-ci maddə üzrə 8 ildən 12 ilədək azadlıqdan məhrum olunma təhlükəsi gözləyir.

Qeyd edək ki, Qubad İbadoğlu iyulun 23-də günorta saxlanılıb.

Becan.az