Arayik Qarabağın Azərbaycana inteqrasiyasına başlayır - Erməni bloger

"Ermənistan hakimiyyətinin Qarabağa humanitar yük göndərməsinin əsl məqsədi üzə çıxıb. Bu, Paşinyan və Arutyunyanın birgə əməliyyatının birinci mərhələsi idi. İkinci mərhələ böyük ehtimalla sabah başlayacaq".

Bakupost.az xəbər verir ki, bu iddia ilə erməni bloger Mika Badalyan çıxış edib.

O qeyd edib ki, sabah Arayik Arutyunyan növbəti mətbuat konfransı keçirəcək:

"Belə bir məlumat var ki, məhz bu mətbuat konfransından əvvəl Ağdam yolu ilə ​​Qarabağa onlarla maşınla humanitar yardım göndərilə bilər. Arayik da öz növbəsində hamının Qarabağı tək qoyduğunu, buna görə də başqa seçimi olmadığını bəyan edərək, çətin qərar qəbul etmək məcburiyyətində olduğunu - Qarabağı aclıqdan xilas etmək üçün Ağdamdan dəhliz açılmasına razılaşdığını, bunun qarşılığında Azərbaycanın Laçın yolunu humanitar yardım üçün açacağını bildirəcək".

Mika Badalyan bildirib ki, belə bir qərar Qarabağın Azərbaycana faktiki inteqrasiyası prosesinin başlamasıdır:

"Bu məsələ 2025-ci ilə qədər qapanacaq. Rusiya sülhməramlıları çıxarıldıqdan sonra isə Qarabağ, nəhayət, tamamilə Azərbaycanın bir hissəsi olacaq".

Erməni bloger bildirib ki, Arayik Arutyunyan Qarabağ ermənilərinin Ağdamdan gələn yük maşınlarının qarşısında canlı qalxan kimi dayana biləcəyindən ehtiyat edir:

"Lakin o, uzun müddət buna hazırlaşıb. Çünki məhz bunun qarşısını almaq üçün o, Nikolla birlikdə Qarabağı 8 aya yaxındır blokadada saxlayır, indi isə faktiki olaraq ac qoyub.

Tamamilə aydındır ki, bu, Qərbin böyük qələbəsi olacaq. Qərb bununla Rusiyanı Qarabağdan sıxışdıracaq və Ermənistandan sıxışdırma prosesini sürətləndirəcək. Əgər Allah eləməsin, Arayik həqiqətən də bu fəlakətli addımı atsa, o zaman bu, Qarabağ üçün çox dəhşətli sınaq olacaq. Heç kimin Qarabağ ermənilərini buna müqavimət göstərməməkdə qınamağa haqqı yoxdur, çünki orada vəziyyət həqiqətən də kritikdir, amma şübhəsiz ki, məğlubedilməz Qarabağ ruhuna ümid var".