Hava şəraiti ilə bağlı sevindirici xəbər

Avqust ayının əvvəllərindən başlayan və hələ də davam edən qaynar hava şəraiti mövcudiyyətini bitirmək üzrədir.

Bu barədə accuweather.com saytı xəbər verir.

Məlumata görə, sabah əvvəlki günlərə nisbətən Azərbaycanda havanın temperaturu 2 dərəcə aşağı düşəcək. Növbəti günlərdə isə hər gün 1 dərəcə olmaqla temperatur aşağı enəcək və artıq ayın 18-də ölkə ərazisində maksimal temperatur bir müddətdir davam edən istilərə nisbətdə 6 dərəcə düşmüş olacaq. Avqustun 18-də müxtəlif ərazilərdə qısamüddətli yağışlar yağacağı da gözlənilir.

Beləliklə, "qora bişirən ay" deyilən avqustun qaynar istiləri ömrünü başa vurmaq üzrədir və hidrometeoroloji proqnoza görə, bir neçə gündür əhaliyə diskomfort hal yaşadan qaynar və bürkülü hava bu il təkrarlanmayacaq. Bu proqnoz həm də ona görə inandırıcıdır ki, artıq yay yarıdan keçib, günlər qısalmaqda, gecələr uzanımaqda davam edir, küləkli-dumanlı-çiskinli payız ağır-ağır yaxınlaşmaqdadır.

Amma unutmayaq ki, hər şeyi daha dəqiq bilən Allahdır!

Becan.az