Bakıda fəaliyyət göstərən Elmi-Tədqiqat Travmatologiya və Ortopediya İnstitutunda tibbi avadanlıqların nasaz olması ilə bağlı narazılıq yaranıb.Becan.az Oxu.az-a istinadən xəbər verir ki, bununla bağlı sosial şəbəkədə paylaşım edilib.
Paylaşımda institutda sümük sıxlığını ölçmək üçün istifadə olunan densitometriya (osteodensitometriya) cihazının olmadığı və ya cihazın işləmədiyi iddia edilib.
Qeyd olunub ki, hər gün onlarla sümük-oynaq əməliyyatının aparıldığı, yüzlərlə pasiyentin sümük xəstəlikləri ilə bağlı müraciət etdiyi tibb müəssisəsində osteoporoz və osteopeniyanın müəyyənləşdirilməsi üçün nəzərdə tutulan belə bir cihazın olmaması xəstələr üçün ciddi problem yaradır.
Müzakirəyə qoşulan başqa bir həkim isə dövlət xəstəxanalarının tibbi təminatının aşağı səviyyədə olmasını önə çəkərək bildirib ki, həkimlərdən peşəkarlıq və tibbi protokollara uyğun fəaliyyət tələb edildiyi halda, xəstəxanaların zəruri avadanlıqla təmin olunmaması qəbuledilməzdir.
Həkim rentgen müayinəsi üçün növbə gözləyən insanların da ciddi çətinliklərlə üzləşdiklərini bildirib. O, şəxsi təcrübəsini bölüşərək qolundan əməliyyat olunduğu qış mövsümündə rentgen müayinəsindən keçmək və həkim rəyi almaq üçün ərazi poliklinikasına müraciət etdiyini deyib.
Onun sözlərinə görə, poliklinikada növbə gözləyərkən ağrıkəsici iynə vurdurmalı olub və soyuq havada uzun müddət gözlədikdən sonra evə qayıdanda bir gün özünə gələ bilməyib.
Məsələ ilə bağlı Oxu.Az-ın sorğusuna cavab olaraq Səhiyyə Nazirliyindən bildirilib ki, Elmi-Tədqiqat Travmatologiya və Ortopediya İnstitutu müasir kompüter tomoqrafiyası (KT) və rəqəmsal rentgen avadanlıqları ilə təchiz olunub.
"Bu avadanlıqlar vasitəsilə sümük toxumasının vəziyyətini, struktur xüsusiyyətlərini, sümükdə baş verən dəyişiklikləri və müxtəlif patoloji əlamətləri qiymətləndirmək mümkündür. Müvafiq klinik göstərişlər olduqda KT və rentgen müayinələri sümük toxumasının vəziyyəti barədə mühüm diaqnostik məlumatların əldə edilməsinə şərait yaradır.
Osteoporoz və osteopeniya kimi xəstəliklərin diaqnostikasında müxtəlif instrumental müayinə üsullarından istifadə olunur. Densitometriya sümük mineral sıxlığının kəmiyyət göstəricilərinin müəyyənləşdirilməsi üçün xüsusi əhəmiyyət daşıyır. Bununla belə, travmatologiya və ortopediya sahəsində bu müayinə əsas diaqnostik üsul deyil, zəruri hallarda tətbiq olunan əlavə müayinə vasitələrindən biridir.
İnstitutda travmatoloji və ortopedik xəstəliklərin diaqnostikası və müalicəsi mövcud tibbi-texniki imkanlar, klinik göstərişlər və müasir tibbi yanaşmalar əsasında həyata keçirilir. Hər bir pasiyentin fərdi klinik vəziyyəti nəzərə alınaraq müvafiq müayinə üsulu müəyyən edilir", - deyə məlumatda bildirilir.