Heydərov 2 ay əvvəl vəzifə verdiyi generalı niyə işdən qovdu?..

Fövqəladə Hallar Nazirliyinin Dövlət Yanğından Mühafizə Xidməti bir ildir mətbuatın gündəmindən düşmür. Belə ki, ötən il isti avqustun elə bu günlərində Xidmət rəisinin köməkçisi, daxili xidmət polkovniki Zaur Mirzəyevin xidməti kompüterinə xüsusi proqram vasitəsilə video və foto çəkiliş həyata keçirmək üçün gizli kamera quraşdırdığı, xidməti və sair asılılıqlarından yararlanmaqla cinsi ehtirasını təmin etmək kimi 2013-cü ildən başlayaraq 2019-cu ilin sonlarınadək iş otağında FHN-də çalışan bir neçə qadına cinsi əlaqə və digər formalarda intim münasibətdə olub video və foto çəkilişlər apardığı üzə çıxdı. Eyni zamanda həmin pornoqrafik materiallar elə o ərəfədə internetdə yayıldı.

O vaxtdan bu günə qədər FHN polkovniki Zaur Mirzəyevin törtədiyi əməllərlə bağlı söz-söhbətlər səngimək bilmir. Hazırda onun məhkəmə prosesi keçirilir, bu səbəbdən mövzu daha da aktuallaşıb.


Maraqlısı isə budur ki, bu cür biabırçılıqdan sonra Nazirliyin Dövlət Yanğından Mühafizə Xidmətinin rəisi, daxili xidmət general-mayoru Füzuli Əsədov uzun müddət vəzifəsində qaldı.

Rəhbərlik etdiyi Xidmətə məxsus kabinetlərdə, eləcə də Füzuli Əsədovun öz kabinetində onun əmisi qızının həyat yoldaşı olduğu deyilən Zaur Mirzəyevin min hoqqadan çıxmasına, ailəli qadınlara qarşı əxlaqsız hərəkətlər etməsinə, bu azmış kimi bu əxlaqsızılığın foto və videoçəkilişlərinin internetdə yayılmasına rəğmən, Füzuli Əsədov bu ilin iyununa kimi vəzifəsinin icrasını davam etdirdi. O, yalnız iyunun 6-da nazir Kəmaləddin Heydərov tərəfindən xidmətdə olmanın son yaş həddi ilə əlaqədər təqaüdə göndərildi.

Nazirin həmin gün imzaladığı digər əmrlə FHN-in Dövlət Yanğın Nəzarəti Xidmətinin rəisi, daxili xidmət general-mayoru Hikmət Abbasov tutduğu vəzifədən azad edilərək, Dövlət Yanğından Mühafizə Xidmətinə rəis təyin edildi.


Bu günlərdə isə Hikmət Abbasov Dövlət Yanğın Nəzarəti Xidmətinin rəisi vəzifəsindən azad edilib. Beləliklə, Hikmət Abbasov Dövlət Yanğın Nəzarəti Xidmətinin rəisi kimi yeni vəzifəsində cəmi iki ay işləyə bildi.

Maraqlıdır, Kəmaləddin Heydərov general-mayoru niyə bu tezliklə vəzifəsindən azad edib?

Nəzərə alsaq ki, bir ildir bu Xidmətin fəaliyyəti mətbuatın diqqət mərkəzindədir, o zaman nazirin belə bir əmr imzalamasının çox ciddi səbəbləri olduğunu ehtimal etmək olar. Əlbəttə, biz Xidmətdə intim olayların yenə də təkrarlandığı iddiasından uzağıq. Bu, çox güləmli olardı. Bəs, o zaman yeni rəis hansı ciddi səhvə yol verib ki, nazir onu vəzifəsindən uzaqlaşdırıb? Bəlkə, Hikmət Abbasov rəhbərlik etdiyi sahənin incəliklərini bilmirdi? Axı, bu, mümkün deyil. Birincisi, o, bundan əvvəl FHN-in digər vacib strukturunun - Dövlət Yanğın Nəzarəti Xidmətinin rəisi idi. İkincisi, FHN sistemində general-mayor vəzifəsinə yüksələn bir adam necə təcrübəsiz ola bilər?..

Belədə, yalnız bir ehtimal inandırıcı görünür. Hikmət Abbasov yenicə təyin olunduğu vəzifədə hansısa qanunsuz əməllərlə məşğul olub. Hər halda, son günlər bir çox rayonlarda Dövlət Yanğından Mühafizə Dəstələri rəislərinin tutduqları vəzifələrdən azad olunması da bunu təsdiq edir. Demək, söhbət Dövlət Yanğından Mühafizə Xidmətinin bütün mərkəzi və yerli strukturlarını əhatə edən nöqsan və qanunsuzluqlardan gedə bilər. Bu neqativ halların nədən ibarət olduğunu təsəvvür etmək isə o qədər də çətin deyil.(Bakupost.az)