İntim videolar çəkən polkovnikə hökm oxunub

FHN-in Dövlət Yanğından Mühafizə Xidmətinin rəisinin sabiq köməkçisi, polkovnik Zaur Mirzəyevin cinayət işi üzrə məhkəmə araşdırması başa çatıb.

Xəbər verilir ki, Bakı Ağır Cinayətlər Məhkəməsində hakim Məhəmməd Əkbərovun sədrliyi ilə keçirilən iclasda Zaur Mirzəyevə hökm oxunub.

Hökmə əsasən Zaur Mirzəyev verilmiş ittihamla təqsirli bilinərək, 3 il 6 ay azadlıqdan məhrum edilib.

İş üzrə zərərçəkənlər hökmdən narazı qalıblar və onların apellyasiya şikayəti verəcəkləri ehtimalı böyükdür.

Xatırladaq ki, Zaur Mirzəyev xidməti kompüterinə xüsusi proqram vasitəsilə gizli kamera quraşdıraraq, qadınlarla 2013-cü ildən başlamaqla, 2019-cu ilin sonlarınadək iş otağında intim münasibətdə olarkən video və foto çəkilişlər aparıb. Hazırlanmış qanunsuz pornoqrafik materiallar 2022-ci ilin avqust ayında internet şəbəkələrində yayılıb.

Qeyd olunan əməllərə görə, Zaur Mirzəyevə qarşı Cinayət Məcəlləsinin 156.2.1 (şəxsi həyatın toxunulmazlığı vəzifəli şəxs tərəfindən öz qulluq mövqeyindən istifadə etməklə törədildikdə), 309.2 (Vəzifə səlahiyyətlərini aşma) və 312-1.1-ci (Vəzifəli şəxsin qərarına qanunsuz təsir göstərmə-nüfuz alveri) maddələri ilə ittiham irəli sürülüb, barəsində həbs qəti-imkan tədbiri seçilib.

Becan.az