Biləsuvarda ekoloji cinayət - VİDEO

Kafe sahibinin yaxınlıqdakı yaşıllığa qənim kəsildiyi bildirilir

Biləsuvar rayonundan Becan.az-a yaşıl ağacların kütləvi kəsilməsi ilə bağlı video material daxil olub. Materialı göndərən Mehman Məmmədoğlu qeyd edir ki, Biləsuvar rayonuna məxsus, lakin Cəbrayıl rayon sakinlərinin məskunlaşdığı 8-ci Qəsəbə ərazisində yerləşən kafenin sahibi İqbal adlı şəxs, yaşıllığı yandırmaq məqsədilə kəsir.

Video materiala əlavə edilən yazılı bilgidə göstərilir ki, sözügedən kafe 8-ci qəsəbə ərazisindəki “Kapitalbank”-ın sol tərəfində yerləşir. Açıq mənbə yazısında daha sonra bildirilir:

“Kafenin sahibi İqbal adlı şəxs Cəbrayıl rayonunun Mehdili kənd sakinidir. İstifadəsində olan kafe, təxminən, 15 il olar ki, fəaliyyətdədir. Öyrənmişəm ki, kafenin heç bir sənədi yoxdur, sadəcə, İqbal qaçqınlıq həyatı yaşadığından, zəbt şəklində olsa da, ona iaşə obyektinin işlədilməsi baxımından, dövlət idarələri tərəfindən bu vaxtadək problem yaradılmayıb. Kafenin yerləşdiyi ərazi isə qəsəbədə yerləşən Mənzil İstismar sahəsinin (JEK) balansındadır.
Kafedə mavi yanacaq olmadığından, qış aylarında istilik məqsədilə yaxınlıqdakı yaşıllıq zolağından iri ağacları kəsib, oduncağa çevirib, yandırırlar. Videoda da göründüyü kimi, 6 ədəd böyük söyüd ağacı təzəcə kəsilib və doğranaraq obyektin quruluğunun altına yığılıb. Nə qədəri yandırılıb, deyə bilmərəm, fakt 6 yaşıl ağacın kəsildiyi göz önündədir.”

M.Məmmədoğlu vurğulayır ki, yaşıllıq zolağının kütləvi qırılması ilə bağlı aidiyyatı qurumlara da məlumat verib:

“Aidiyyatı üzrə ekspert rəyi, icazə sənədi olmadan kəsilən ağacların taleyi ilə bağlı Ekologiya və Təbii Sərvətlər Nazirliyinin Biləsuvar Regional idarəsinin Talıb adlı nümayəndəsinə dekabr ayının sonlarında məlumat verilib, lakin hələ də əraziyə baxış keçirilib, müvafiq tədbirlər görülməyib. Əvvəlcə ekoloji hadisədən xəbərsiz olduğunu söyləyən ETSN səlahiyyətlisinin, ona xəbər veriləndən sonra da bu ekoloji cinayətə susqunluqla yanaşması, başa düşülən hal deyil.”

Mövzunu diqqətdə saxlamaqla, adı çəkilən şəxslərin cavab fikirlərini dinləməyə hazırıq.



Becan.az