Ağsudakı yiyəsiz itlər “yiyə”siz qalıb

Bu barədə Becan.az-a Ağsu şəhər sakinləri tərəfindən göndərilən video görüntüdə deyilir

Video çəkilişi Ağsunun Səməd Vurğun küçəsində yaşayan Fazil Rüstəmov göndərib. Küçə sakinləri adından şikayət edən F.Rüstəmov bildirir ki, sahibsiz itlərin qorxusundan uşaqlarını məktəbə də buraxa bilmirlər.
Şikayətçi qeyd edir ki, iki ay əvvəl küçə itləri 11 yaşlı uşağını yerə yıxıb, sürüyüblər: “İki gün əvvəlsə, balaca uşağımın üstünə hücum çəkiblər. Uşağın qorxudan dili qatlanmışdı. Altı gündən çoxdur uşaqlarımı, yiyəsiz itlərə görə, məktəbdən də saxlamışam. İki aydan çoxdur ki, bu barədə aidiyyatı qurumlara, rayon icra hakimiyyətinə müraciət eləmişəm. Gah deyirlər, itləri öldürmək olmaz, gah da deyirlər, problemi həll eləyəcəyik. Ancaq bu günə kimi küçə itlərinə yiyə duran tapılmır.”

Redaksiyadan: Qeyd edək ki, sahibsiz itlərin sakinlərə zərər toxundurmaması və xəstəlik daşıyıcısı olmaması baxımından, əsas məsuliyyəti rayon icra hakimiyyətləri daşıyır. Çünki dövlət qanunlarına əsasən, sahibsiz heyvanlara qarşı mübarizə tədbirlərini yerli icra hakimiyyəti orqanları həyata keçirməlidirlər. Sahibsiz heyvanlar problem yaratdıqları halda əziyyətlərə, ağrılara məruz qoymayan üsullarla onların sayının azaldılması üçün zəruri tədbirlər görülməlidir. Tutulan sahibsiz heyvanlar müvafiq sığınacaqlarda saxlanılmalıdır. Ev heyvanlarının sayının planlaşdırılmamış artımı sterilləşdirilmə (axtalama) vasitəsilə azaldılmalıdır. Heyvanlar quduzluğa, insan həyatı üçün təhlükəli olan digər xəstəliklərə tutulduqda və ya insanların həyat və sağlamlığı üçün təhlükə yaratdıqda, məhv edilməlidir. Müxtəlif səbəblərdən ölmüş (yaxud, qanunlar çərçivəsində öldürülmüş) heyvanların cəsədlərinin məhv edilməsi baytarlıq nəzarətində olan heyvan qəbiristanlığında, yaxud mərkəzləşdirilmiş util zavodunda aparılmalıdır...

Biz də bilmirik, görəsən, Ağsu rayonunda İH-nin nəzdində sahibsiz heyvanlara qarşı mübarizə idarəsi varmı?.. Varsa, həmin idarənin sahibsiz heyvanların mühafizə olunması üçün xüsusi ərazisi mövcuddurmu?.. Həmin ərazi mövcuddursa, rayonunu Baytarlıq idarəsi ordakı heyvanları nəzarətdə saxlayıb, müayinə edirlərmi?..

Güman ki, yuxarıda suallar şəklində sadaladığımız şərait Ağsu rayonunda yoxdur. Olsaydı, vətəndaşlar itlərdən şikayətçi düşməzdilər. Amma inanırıq ki, Ağsu RİH bu anormal vəziyyəti düzəltmək üçün büdcəsindən maliyyə ayırıb, sahibsiz itlərə baytar nəzarəti altında xüsusi sığınacaq ayıracaq və sakinləri həyati əhəmiyyətli bir problemdən qurtaracaq.

Mövzuda adları hallanan qurumların rəsmi mövqelərini dərc etməyə hazırıq.

Becan.az