"Qarabağ Sizsiz... " - Şəhidlərə həsr olunmuş kitabın təqdimatı keçirilib

04 aprel 2024-cü il tarixində Respublika fizika-riyaziyyat və informatika təmayüllü liseydə tarix müəllimi Günay Şərifzadənin təşkilatçılığı ilə şagirdlər tərəfindən hazırlanmış 3 cildlik “Qarabağ Sizsiz...” kitabının təqdimatı keçirilib.

Təqdimat üçün düzənlənən tədbirdə Aprel, Tovuz döyüşlərində və 44 günlük Vətən müharibəsində şəhid olmuş əsgər və zabitlərimizin valideynləri, qazilər, Vətən Müharibəsi Qəhrəmanları, digər ictimaiyyət nümayəndələri iştirak ediblər.

Tədbir Azərbaycanın azadlığı və ərazi bütövlüyü uğrunda canından keçmiş şəhidlərimizin xatirəsinin birdəqiqəlik sükutla yad edilməsi ilə başlayıb. Daha sonra Dövlət Himni səsləndirilib.

Tədbirin girişində liseyin direktoru Tariyel Talıbov açılış nitqi söyləyib.


Açılış nitqinin ardınca tədbir lisey şagirdlərinin hazırladıqları müxtəlif səhnəciklərin və şəhid valideynlərinin çıxışlarının növbələşməsi ilə davam edib.

Yığıncağın sonunda “Qarabağ Sizsiz ...” kitabının tərtibçisi, ideya müəllifi Günay Şərifzadə çıxış edərək, şərait yaradanlara təşəkkürlərini bildirib. O, kitabın birinci cildinin ilk dəfə indi 11ç sinfində oxuyan şagirdlərin köməyi ilə yazıldığını, sonrakı nüsxələrinin 10ç, 10d, 10e sinif şagirdlərinin iştirakı ilə tamamlandığını qeyd edib.


Müəllif, eyni zamanda, kitabın adı ilə bağlı da qısaca məlumat verib. Belə ki, “Qarabağ Sizsiz ...” adını Şəhid General, Milli Qəhrəman Polad Həşimovun övladı, liseyin 11ç sinif şagirdi Davud Həşimovun təklif etdiyini diqqətə çatdırıb. G.Şərifzadə vurğulayıb ki, bu ad iki mənada düşünülür: birinci mənada Qarabağ Sizsiz, - yəni, Siz elə Qarabağın özüsüz; digər mənası - Qarabağ azaddır, amma fiziki olaraq Sizsizdir.

Tədbir “Qarabağ Azərbaycandır!” şüarı ilə sona çatıb.

Liseyin rəhbərliyi tədbirin təşkilində əməyi olan hər kəsə tək-tək təşəkkür edib, cansağlığı, işlərində uğurlar arzulayıb.



Becan.az