Xalq artisti baltalayır, polis yerindəcə məhv edir...

Son iki günün kriminal xronikası adamı dəhşətə gətirir: 59 yaşlı kişi 75 yaşlı ağsaqqalı bıçaqlayıb öldürür; 33 yaşlı oğul 57 yaşlı anasını qətlə yetirir; ata 10 və 2 yaşında övladlarını bıçaqlayır, biri ölür, sonra da özünə qəsd edir; 10 il öncə Azərbaycan çempionu olan, 105 kilo çəkidə ağırlıqqaldırma üzrə nəticə göstərən idmançı övladını girov götürür…

Bu ölkənin diplomatı olmuş şəxs adam bıçaqlayır… və günün daha bir dəhşəti: Xalq artisti Ağadadaş Ağayev qonşusunu “baltalayır”.

Nə baş verdiyini, hansı milli-mental dəyişikliklərin getdiyini anlamaq belə çətindir.

75 yaşlı kişinin bıçaqlanmasını təsəvvür etmək mümkün olmadığı kimi, bir atanın öz övladlarını doğramasını da şüur qəbul edə bilmir.

Uzun illər diplomat işləmiş bir şəxsi bıçağa əl atmağa nə vadar edə bilər? Bir ölkənin xalq artıstinin qonşusuna balta ilə xəsarət yetirməsi məlumatı hardan çıxdı?

İnanılmaz olaylardır!

Heç bir ay keçməyib polislərimizə edilən hücumdan – Şüvəlanda 3 polis qətlə yetirilmişdi. Ardınca cinayətkarı Bakının ortasında saxlamağa çalışan polis kapitanı bıçaqlanıb öldürüldü.

Hələ o zaman bu xalqın düşüncəsində hansısa dəyişikliklər getdiyini və bunun çox təhlükəli nəticələri haqda xəbərdarlıq etmişdik: əgər Azərbaycan xalqının hansısa fərdində polisə silah qaldıracaq, bıçaq çəkəcək qədər dəyişiklik gedirsə…

Biz hələ o faktdan dəhşətə gəlmişdik – ardınca baş verənləri görürsünüzmü? 4 yaşlı övladı necə bıçaqlamaq olar? Öz övladını hansı düşüncə ilə “girov” götürə bilərsən?

O həddə çatdırdılar ki, polis artıq silaha əl atdı. Yaxın illərdə xatırlamıram ki, Azərbaycan polisi övladını və ya doğmasını girov götürən bir şəxsi yerindəcə güllələyib məhv etsin. Xatırlamıram, məncə, olmayıb belə bir şey!

Ancaq Şüvəlanda 3 polisin qətli artıq təlimatı dəyişir: bir azərbaycanlı kişi öz doğmalarının arasında gizlənib, 3 polisi qətlə yetirirsə, artıq kimsənin öz övladının arxasında gizlənməsinə, öz övladını hansısa səbəblə girov götürməsinə polis təhəmmül etməyəcəkdi!

Bax, narahatlığımızın səbəbi bu idi: polis artıq qarşısındakı xırda xuliqanın, ya cinayətkarın, ya sadəcə dələduzun təhlükəsiz olduğuna, ona əl qaldırmayacağına inanmır. Oysa bu ölkənin polis polkovniki 2018-ci ildə əlində qılınc olan kütlənin içinə silahsız girib, danışıqlar aparmaq cəsarətində idi. Çünki inanırdı, əmin idi ki, o qılınc polisə qalxmaz, azərbaycanlı heç vaxt polisə silah işlətməz, ona zərər verməyi ağlının ucundan keçirməz.

Cəmi 6 il keçib, 6-ca il – polislərin qətllləri sıralanır və polis artıq adekvat tədbirlər göstərməyə məcburdur. Sabah bu ölkədə yol polisinin qanuni əmrinə tabe olmayan “əsəbi” sürücünün zərərsizləşdirilməyəcəyinə də güman yoxdur – çünki psixologiya dəyişir, polis qarşısındakından artıq ehtiyat edir, onun qətl törətməyəcəyinə inamı qalmayıb.

Bir ölkədə 75 yaşlı kişi öldürülürsə, oğul anasını amansızcasına qətlə yetirirsə, diplomatı adam bıçaqlayırsa, ata öz körpəsini qətlə yetirirsə, daha polisdən hansı humanizm, hansı inam gözləmək olar? Oğlunu girov götürüb, boğazına bıçaq dayayan şəxsə polis necə inana bilər? Öz dogma oğlunu qətlə yetirən ataya hansı meyarla güvənib, silahsız ona yaxınlaşa bilər?

Dəngələr dəyişir, bu xalqın əxlaqı darmadağın olur, onillərlə öyrəşdiyimiz münasibətlər sistemi məhv edilir.

Bu xalqın mental düşüncəsində eybəcər transformasiya baş verir.

Televiziyaların əxlaqımıza hücumlarının nəticəsidir; sosial şəbəkələrin bu dəyərlər sisteminə zərbələrinin “bəhrəsidir”.

Yəni bir tədbir görülməyəcəkmi? Biz zaurların bu xalqın əxlaqını dəyişməsinə nə qədər seyrçi qalacağıq?

Şeyx TEYMUR