Ağsu İH-də əməliyyat: Bir neçə vəzifəli şəxs saxlanıldı - YENİLƏNİBİ

Ağsu rayon İcra Hakimiyyətində əməliyyat keçirilib.

"Report" xəbər verir ki, hüquq-mühafizə orqanları tərəfindən keçirilən əməliyyatın İcra Hakimiyyətində korrupsiya halları ilə bağlı olduğu bildirilir.

Əməliyyat nəticəsində bir neçə vəzifəli şəxs saxlanılıb.

***

Yerli mənbələrdən Becan.az-ın əldə etdiyi məlumatlara görə, bu günlərdə dövlət hüquq mühafizə orqanları tərəfindən Ağsu rayon İH-də əməliyyat həyata keçirilib. Əməliyyat nəticəsində İH-nin Ərazi idarəetmə və yerli özünüidarəetmə orqanları ilə iş şöbəsinin əməkdaşı, ƏMDX-nin müfəttişi və bir neçə vəzifəli şəxs saxlanılıb.

Əməliyyatın korrupsiya və yeyinti halları ilə bağlı aparıldığı bildirilir.

***

Ağsu Rayonu İcra Hakimiyyətinin ərazi idarəetmə və yerli özünüidarəetmə orqanları ilə iş şöbəsinin müdiri Feyzullayev Sənan Nadir oğlu və Əmlak Məsələləri Dövlət Xidmətinin Şamaxı Ərazi şöbəsinin Torpaqların idarə edilməsi və istifadəsinə nəzarət sektorunun Ağsu rayonu üzrə məsləhətçisi Əsgərov Vüqar Səxavət oğlunun qanunsuz hərəkətləri ilə bağlı həyata keçirilmiş əməliyyat-axtarış tədbirləri nəticəsində Baş prokuror yanında Korrupsiyaya qarşı Mübarizə Baş İdarəsində cinayət işi başlanıb.

Bakupost.az xəbər verir ki, bu barədə Baş Prokurorluğun Mətbuat xidmətinə daxil olmuş sorğulara cavab olaraq bildirilib.

Qeyd olunub ki, aparılmış istintaq-əməliyyat tədbirləri ilə Vüqar Əsgərov və Sənan Feyzullayevin cinayət əlaqəsinə girərək aidiyyəti dövlət orqanlarının səlahiyyətli vəzifəli şəxslərinin qərarlarına qanunsuz təsir göstərməklə Ağsu rayonu ərazisində yerin təkindən istifadəyə dair icazə verilməsi üçün vətəndaşdan müxtəlif məbləğlərdə pul vəsaiti tələb etmələrinə və almalarına əsaslı şübhələr müəyyən edilib.

“Toplanmış ilkin sübutlar əsasında Vüqar Əsgərov və Sənan Feyzullayevə Cinayət Məcəlləsinin 312-1.1-ci (nüfuz alveri) maddəsi ilə ittiham elan edilməklə müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Binəqədi Rayon Məhkəməsinin qərarı ilə ev dustaqlığı (əsas) və vəzifədən kənarlaşdırma (əlavə) qətimkan tədbirləri seçilib.

Hazırda cinayət işi üzrə bütün halların tam və hərtərəfli araşdırılması davam etdirilir”, - məlumatda qeyd olunub.