İranın zəifləməsinə və parçalanmasına imkan verməyəcəyik - Pezeşkian

İran Prezidenti Məsud Pezeşkian ölkənin siyasi elitası ilə keçirdiyi görüşdə xarici siyasət, sanksiyalar və ABŞ ilə münasibətlər barədə sərt bəyanatlar səsləndirib.

Xəbər verilir ki, bu barədə İran KİV məlumat yayıb.

Məlumata görə, “Milli birliyə nail olmağın həll yolları və çətinliklərin aradan qaldırılması metodları” mövzusuna həsr olunmuş görüşdə dövlət başçısı anti-İran sanksiyalarına toxunub.

Pezeşkian bildirib ki, İran vaxtilə ABŞ ilə danışıqlar aparırdı və razılığa gəlməyə hazır idi, lakin Vaşinqton tərəfi müharibə yolu ilə sazişi pozub:

“İndi onlar danışıqları davam etdirmək üçün alçaldıcı şərtlər təklif edirlər ki, mən bunları qəbul etməyə hazır deyiləm. Biz alçaldılmağa dözməyəcəyik, zəif və parçalanmış İranı qəbul etməyəcəyik”.

O həmçinin qeyd edib ki, İran İslam Respublikası münaqişə tərəfdarı deyil və nüvə silahı yaratmaq niyyətində olmadığını dəfələrlə bəyan edib:

“Biz istənilən yoxlamaya hazırıq, lakin qarşı tərəf ölkəni sionist rejimin qarşısında zəiflətməyə çalışır. Biz sülh tərəfdarıyıq, lakin təhdidləri qəbul etmirik”.

Becan.az