Hökumət özünün aqrar siyasətinə yenidən baxmalıdır

Dövlət Gömrük Komitəsinin açıqladığı məlumata görə, 2022-ci ildə Azərbaycana 2 milyard 363 milyon 142 min dollar dəyərində yeyinti məhsulları idxal edilib. Apardığımız hesablamalar göstərdi ki, əvvəlki ilin eyni dövrü ilə müqayisədə 2022-ci ildə yeyinti məhsulları idxalı 432,251 min dollar dəyərində, yəni 22,4% artmışdır. Belə ki, ölkəyə 2021-ci ildə 1 929 891 min dollar dəyərində yeyinti məhsulları idxal edildiyi halda qeyd edildiyi kimi 2022-ci ildə yeyinti məhsulları idxalı 2 363 142 min dollar təşkil etmişdir.

Onu da qeyd edək ki, ölkə tarixində indiyə kimi heç zaman Azərbaycana bu məbləğdə yeyinti məhsulları idxal edilməmişdir. Təsəvür edin, 2015-ci illə müqayisədə ölkəyə idxal edilən yeyinti məhsulları dəyər ifadəsində 2,4 dəfədən çox artmışdır. Bu o deməkdir ki, əvvəlki 7-8 illə müqayisədə 2022-ci ildə yeyinti məhsullarının idxalı üçün ölkədən 2,4 dəfə çox valyuta çıxarılmışdır. Baxmayaraq ki, 2022-ci ildə ölkədə ərzaq məhsullarına olan təlabat bir o qədər də artmayıb. Belə ki, koronavirus (COVID-19) pandemiyasının yaratdığı böhran nəticəsində turizm sektorunda tənəzzül Azərbaycanda 2022-ci ildə də davam etmişdir.(turan.az)