Suriyada etirazlar: Əsədin atasının heykəli dağıdıldı - VİDEO

Suriyanın cənubundakı Suveyda şəhərində yüzlərlə etirazçı tanınmış druz müxalifət liderinin öldürülməsinin ildönümündə Suriya prezidenti Bəşər Əsədin atası Hafiz Əsədin heykəlini dağıdıb.

Bu barədə "Arab News" bildirib.

Suriya İnsan Haqları Müşahidə Qrupunun məlumatına görə, etirazçılar əvvəlcə Suveyda bələdiyyəsinin binasına daxil olublar. Onlar Hafiz Əsədin oradakı heykəlini çıxararaq yaxınlıqdakı küçədə dağıdıblar.

Sosial şəbəkələrdə yayılan videolarda nümayişçilərdən bəzilərinin qəzəbli halda heykəlin dağıntılarını təpiklədiyi görünür. Həmçinin, bir qrup nümayişçi yerli sosial təminat idarəsinin binasına daxil olaraq, Bəşər Əsədin təsviri olan nəhəng plakatı oradan götürüblər.

Xatırladaq ki, Suriyanın cənubunda yüzlərlə insan bir neçə həftədir etiraz aksiyası keçirərək, həyat şəraitinin pisləşməsi ilə əlaqədar prezident Bəşər Əsədi istefaya çağırır. Etirazlar daha çox Əsədlə Suriya müxalifəti arasında gedən vətəndaş müharibəsində bitərəf qalan druz dini azlığının sıx məskunlaşdığı Suveyda vilayətində keçirilir.(Bakupost.az)

pic.twitter.com/QeGsNpsVIT

— Newsfeed (@Newsfeed883920) September 5, 2023