"Təhsil xərcləri ədalətsiz bölünür" - Ekspert

"Azərbaycan təhsilində ən böyük problemlərdən biri adambaşına düşən təhsil xərclərinin düzgün paylanmamasıdır. Bu illərdir ki, belədir. Burada ədalətsiz bölgü müşahidə olunur. Bunun yaranma səbəbi isə şagird sayı az olan məktəblərin ucqar ərazilərdə yerləşməsi, yaxın kəndlər arasında olan məsafənin çox olması və nəqliyyat problemidir”.

Bu fikirləri açıqlamasında Azərbaycan Gənc Alim, Doktorant və Magistrlər Cəmiyyətinin sədri, fəlsəfə doktoru İlqar Orucov deyib.


O bildirib ki, ölkədə təhsil icbari olduğundan, dövlət bunu təmin edir:

“Bu gün şagird sayı 5 nəfər olan məktəblə, şagird sayı 40 nəfər olan sinifdə dərs keçən müəllimin aldığı əmək haqqı eynidir. Çünki müəllimlər saat hesabı ilə əmək haqqı alır. Şagird sayına baxıldıqda görünür ki, ucqar kənddə beş şagirdə dərs keçən müəllimlə 40 şagirdə dərs keçən müəllim arasında heç bir fərq qoyulmur. Məktəbin kommunal və sair xərclərini hesabladıqda, görünür ki, şagird sayı az olan məktəblə şagird sayı çox olan məktəbin saxlanma xərcləri arasında elə də ciddi fərq yoxdur".

İ.Orucov qeyd edib ki, bu gün dövlət ucqar kəndlərdə oxuyan şagirdlərin təhsilinə özəl məktəblərdəki təhsil haqqı məbləğində vəsait xərcləsə də, nəticə aşağıdır:

“Şagirdbaşına maliyyə düzgün paylanarsa, bu, təhsilin keyfiyyətinə də təsir edər. Çünki bu, müəllimlərin əmək haqqına da təsir edəcək bir amildir”.(Bakupost.az)