"İnsan dənizi" romanı Güney Azərbaycanda işıq üzü görüb

Roman Azərbaycan oxucularına 1991-ci ildən tanışdır


Yazıçı-ədəbiyyatşünas Vaqif Sultanlının “İnsan dənizi” romanı bu günlərdə Güney Azərbaycanda nəşr olunub.

Bu barədə Becan.az saytına məlumatı müəllif Vaqif Sultanlı özü verib.

Təbrizin nüfuzlu “ANAS” nəşriyyatında yayınlanan kitabı əski əlifbaya Milad Teymuri (Teymur Turanlı) çevirib.

Bildirək ki, “İnsan dənizi” romanı Vaqif Sultanlının Güney Azərbaycan oxucularına təqdim olunan ilk kitabı deyil. Bundan öncə yazıçının eyniadlı romanı tanınmış türkoloq Dr. Böyük Mollayinin fars dilinə çevirisində Tehranda (2014) və Zəncanda (2015) kütləvi tirajla yayınlanıb. Həmçinin, müəllifin “Səhra savaşı” romanı, povest və hekayələrdən ibarət “Heçlik vadisi” kitabı Tehranda və Təbrizdə əski əlifbada nəşr olunub. Vaqif Sultanlının Dr. İrəc İsmayılla birgə hazırladığı “Güney Azərbaycan nəsri: başlanğıcdan günümüzədək” antologiyası da İranda işıq üzü görüb.

Hadisə və əhvalatların ötən əsrin səksəninci illərində cərəyan etdiyi “İnsan dənizi” romanında ölüm cəzasından qaçıb, yad şəhərə sığınaraq, gizli şəkildə ömür sürən qəhrəmanın taleyi fonunda cəmiyyətin mənəviyyatına yoluxmuş özgələşmə problemi bədii həllini tapıb. Yazıçı baş qəhrəmanın daxili dünyasının dərinliklərinə varmaqla, mövcud sosial ziddiyyətlərin mahiyyətini oxucuya çatdırmağa çalışıb, bununla da cəmiyyətdən təcrid edilərək, yaşamağın mürəkkəb və mümkünsüz olduğunu real, gerçək lövhələrlə yarada bilib. Romanda dolayısı ilə sovet siyasi rejimi dönəmində dəyərlər sisteminin dağılması ilə insanların yaşadığı cəmiyyətə uyğunlaşa bilməməsinin gətirdiyi faciələr inandırıcı cizgilərlə canlandırılıb.

Azərbaycan oxucularına ilk dəfə 1991-ci ildə təqdim edilən “İnsan dənizi” romanı çeşidli dillərə tərcümə olunaraq, Böyük Britaniya, ABŞ, Misir, Türkiyə, Almaniya, Rusiya və başqa ölkələrdə yayınlanıb.

Becan.az