Ət istehsalı azalıb - Xaricdən idxala başlanıldı
İqtisadiyyat
12:35
12.02.2024
1 932
“Azərbaycan xarici ölkələrdən dondurulmuş ət alışını artırıb. Qeyd edim ki, dondurulmuş ət və ət məhsulları əsasən dövlət satınalmalarında, məsələn, orduda və digər yerlərdə istifadə olunur. Amma həmin ət məhsulları restoran və kafelərə də verilir. Bazarlarda isə az satılır”.
Bu sözləri iqtisadçı ekspert Natiq Cəfərli deyib.
Onun sözlərinə görə, Azərbaycan əsasən, Hindistan, Rusiya və Gürcüstandan dondurulmuş iribuynuzlu heyvan əti alır:
“Son zamanlar Azərbaycan Hindistandan dondurulmuş ət alışını artırıb. Hindistanda bir sıra yerlərdə mal əti daha ucuzdur. Çünki həmin yerlərdə iribuynuzlu mal-qaranın ətindən istifadə edilmir. Bu, onların inancları ilə bağlıdır.
Qeyd edim ki, son illər Azərbaycana xaricdən dondurulmuş ətlə yanaşı, diri mal-qaranın gətirilməsi də artıb. Bu, o deməkdir ki, özümüz ölkənin ət ehtiyacını təmin edə bilmirik. Əsas səbəblərdən biri də yerli istehsal üçün yem bazasının zəifləməsidir. Yem üçün nəzərdə tutulan əkin sahələrinin bir qismində pambıq əkilir. Bu da yem bazasını olduqca zəiflədir və qiymətlərin bahalaşmasına səbəb olur.
Təbii ki, bütün bunlar mal ətinin satışına təsirsiz ötüşmür. Yerli istehsal azalan kimi xarcdən idxal da artır”.(Bakupost.az)
Oxşar xəbərlər
{sape_links}