Ət ucuzlaşmayacaq, əksinə... - AÇIQLAMA

“Ətin ucuzlaşması müvəqqəti xarakter daşıyır. İlin sonuna doğru mal və qoyun ətinin qiyməti qalxacaq. Ət və ət məhsullarının istehsalı və tədarükü əvvəlki illərə nisbətən xeyli aşağı düşüb. Bu səbəbdən də ətin qiymətində ucuzlaşma olmayacaq”.
​
Xəbər verilir ki, bunu iqtisadçı ekspert Pərviz Heydərov deyib.

Onun sözlərinə görə, ətin qiymətinin qalxması prosesi uzun müddət davam edəcək:

“İllər əvvəl Azərbaycan özünü ət və ət məhsulları ilə təmin etmək baxımından 80-90 faiz göstəriciyə malik idi. Lakin son vaxtlar bir sıra subyektiv, həm də obyektiv səbəblər ucbatından,yəni həm yem məhsullarının bahalaşması, həm örüş yerlərinin azalması kimi səbəblərdən heyvandarlıq sahəsində ciddi geriləmə müşahidə olunur. Bunun nəticəsində hazırda ətin qiyməti illər öncəki ilə müqayisədə olduqca bahadır. Ətin qiymətinin bahalaşması qarşıdakı dövr ərzində də qaçılmaz görünür. Ona görə də bu məsələyə təcili olaraq diqqət yetirilməlidir. Heyvandarlıq sahəsindəki geriləmənin qarşısı təcili alınmalıdır”.


Ekspert bildirib ki, ət tədarükünün artımı üçün qapalı heyvandarlığın inkişaf etdirilməsi fikri tez-tez səslənir:


"Qapalı heyvandarlıq təcrübəsi bir çox ölkələrdə, eləcə də bizdə də var. Bir sıra regionlarda bununla məşğul olurlar. Lakin məsələ bunun üçün böyük vəsait tələb olunmasındadır. Qapalı heyvandarlıq heyvanların qapalı şəraitdə fermada saxlanmasıdır. Bu zaman heyvanın yemi də, suyu da qapalı şəraitdə verilir. Hər fermer, kəndli bu imkana sahib deyil. Otun bağlaması 6-7 manatdır. Adi kəndli, fermer ona yem çatdıra bilməz. Bu xərclər nəzərə alınaraq dövlət tərəfindən iri müəssisələr yaradılmalı və ət tədarükü səviyyəsi artırılmalıdır. Bu işlər görülməsə biz qarşıdakı illərdə ciddi problemlə qarşılaşacağıq. Qıtlıq ola bilər. Qıtlıq olan zaman da təbii ki, qiymət artır”.


İqtisadçı ekspert​ Natiq Cəfərli​ bildirib ki, ölkədə demək olar ki, bütün məhsulların qiyməti qalxıb. Ət satışı ilə məşğul olan insanlar da istehsal etdikləri məhsulun qiymətini qaldırmağa məcbur olurlar:

“Örüş yerlərinin​ və yem bazasının azalması, yem məhsullarının qiymətinin qalxması ətin qiymətinin qalxmasına təsir edən əsas faktorlardır".(Bakupost.az)