Polis tərəfindən saxlanılan AXCP sədrinin müavini sərbəst buraxılıb

Bu gün AXCP İdarə Heyətinin üzvü, partiya sədrinin müavini Ayaz Məhərrəmovun Şirvan şəhərində polis əməkdaşları tərəfindən "oğurluqda şübhəli bilinərək" saxlanılması barədə məlumatlar yayılmışdı.

Məsələ ilə bağlı DİN-in Mətbuat Xidmətindən KİV-ə bildirilmişdi ki, iyunun 6-da saat 23 radələrində DİN-in “102 Zəng Mərkəzi”nə Şirvan şəhərində evlərin birinə oğurluq məqsədilə naməlum şəxsin daxil olması və bunun yaşayış sahəsində mövcud olan kameraya düşməsi ilə bağlı müraciət daxil olub. Polis əməkdaşları tərəfindən çağırış üzrə həmin ünvanda olan şəxs saxlanılaraq Şirvan Şəhər Polis Şöbəsinə gətirilib. Araşdırmalarla həmin şəxsin Bakı şəhər sakini, əvvəllər dəfələrlə məhkum olunan, 1982-ci il təvəllüdlü Məhərrəmov Ayaz Həbib oğlu olması müəyyən edilib. Fakt üzrə araşdırma aparılır.

DİN-in Mətbuat xidmətinin yaydığı növbəti xəbərə əsasən, Şirvan şəhərində polis əməkdaşları tərəfindən saxlanılan AXCP İdarə Heyətinin üzvü, partiya sədrinin müavini Ayaz Məhərrəmovun artıq sərbəst buraxılıb.

Qeyd olunub ki, onun barəsində qanunvericiləyə uyğun tədbir görülüb.

Becan.az