Elektron siqaretlər daha təhlükəlidir? - Alimlərin araşdırması

Mançester Metropolitan Universitetinin alimləri müəyyən ediblər ki, adi siqaret əvəzinə elektron siqaretdən istifadə edən insanlar daha çox nikotin qəbul edirlər. Bu isə onları demans, çoxlu orqan çatışmazlığı və ürək-damar xəstəliklərinin inkişaf riski ilə üz-üzə qoyur.

Bakupost.az xəbər verir ki, araşdırmanın nəticələri BMJ (British Medical Journal) jurnalında dərc olunub.

Araşdırmanın baş müəllifi Maksim Boydenin fikrincə, veyplərin əsas təhlükəsi insanların siqaretə həddindən artıq aludə olmasıdır. Alim qeyd edib ki, adi siqaret çəkmək insanda prosesin tamamlanma hissini yaradır, veyplərdən istifadə isə prosesi istənilən mühitdə davam etdirməyə imkan verir, bu da onları daim nikotindən istifadə etməyə məcbur edir.

Tədqiqat göstərib ki, veyp çəkənlərin damar sağlamlığında siqaret çəkənlərdə olduğu kimi əhəmiyyətli dəyişikliklərə bənzər pozuntular var. Bu pozuntular beyinə qan tədarükünün azalmasına və demans da daxil olmaqla müxtəlif koqnitiv pozuntuların inkişafına səbəb ola bilər.

Elektron siqaretlərin tərkibindəki kimyəvi birləşmələr - nikotin, metallar və propilen qlikol veyplə bağlı zərərin əsas səbəblərindəndir. Onlar iltihabı və oksidləşdirici stressi gücləndirir, orqan çatışmazlığına, arterial divarın məhvinə və ürək-damar xəstəlikləri riskinin artmasına səbəb olur.