Paşinyan liderliyi əldə saxlayır

Ermənistan Baş naziri Nikol Paşinyan və “Vətəndaş Müqaviləsi” Partiyası qarşıdan gələn parlament seçkiləri öncəsi rəqiblərini qabaqlayır.

Becan.az Teleqraf-a istinadən xəbər verir ki, bu qənaətə Ermənistanda sorğu keçirən Beynəlxalq Respublikaçı İnstitutu (IRI) gəlib.

Sorğuda iştirak edənlərin 32 faizi Vətəndaş Müqaviləsi Partiyasına səs verəcəyini bildirib. İkinci yerdə isə 6 faizlə rusiyalı oliqarx Samvel Karapetyanın “Güclü Ermənistan” bloku qərarlaşıb.

Sorğuda iştirak edənlərin 23 faizi qərarsız olduğunu deyib, 21 faiz isə cavab verməkdən imtina edib.

IRI-nin 2026-cı ilin mart ayında keçirdiyi əvvəlki sorğuda iştirakçıların 24 faizi Paşinyanın “Vətəndaş Müqaviləsi” Partiyasına, 9 faizi isə Karapetyanın “Güclü Ermənistan” blokuna səs verəcəyini bildirmişdi.

İyunun 7-də keçiriləcək seçkilər kritik yarış və Ermənistanın geosiyasi istiqaməti ilə bağlı referendum kimi qiymətləndirilir. Paşinyan Qərblə əlaqələri dərinləşdirməyə çalışdığı halda, Karapetyan və digər müxalif fiqurlar, xüsusən də “Çiçəklənən Ermənistan” partiyasının sədri Qaqik Sarukyan və “Ermənistan” blokunun lideri Robert Köçəryan Rusiyaya yaxın xətt yürüdür. Sorğuda iştirak edənlərin 4 faizi Köçəryan, 3 faizi isə Sarukyanın partiyasına səs verəcəyini qeyd edib.

Digər suallara verilən cavablar seçicilərin Ermənistanın hazırkı istiqamətini əsasən müsbət qiymətləndirdiyini göstərir. İştirakçıların 61 faizi ölkənin doğru istiqamətdə irəlilədiyinə inandığını bildirib.

Xarici siyasət və təhlükəsizlik hələ də Ermənistanda ən mühüm mövzulardır. Seçicilərin fikrincə, Ermənistanın qarşısında duran əsas problem kimi bu iki məsələ 17 faizlə birinci yerdədir. İqtisadiyyat isə 15 faizlə ikinci sırada qərarlaşıb. Bundan başqa, seçicilərin əsas problem kimi göstərdiyi digər təhlükəsizliklə bağlı məsələlər arasında “sülhün olmaması” 12 faiz, “yanlış xarici siyasət” 6 faiz, “regional təhlükəsizlik” isə 4 faiz təşkil edir.

Müşahidəçilərin fikrincə, 2025-ci ilin avqustunda Azərbaycan Prezidenti İlham Əliyev, Ermənistan Baş naziri Nikol Paşinyan və ABŞ Prezidenti Donald Trampın iştirak etdiyi tarixi Vaşinqton görüşü təhlükəsizlik narahatlıqlarının azalmasına ciddi təsir göstərib. 2025-ci ilin iyun ayında keçirilən sorğuda iştirakçıların 44 faizi milli təhlükəsizlik və sərhəd problemlərini Ermənistanın ən böyük problemi hesab edirdi.