Azərpaşa Nemətov vəfat edib

Akademik Milli Dram Teatrının bədii rəhbəri Xalq artisti Azərpaşa Nemətov dünyasını dəyişib.

Akademik Milli Dram Teatrdan verilən məlumata görə, A.Nemətov II Fəxri xiyabanda dəfn ediləcək. Mərhumla vida mərasimi aprelin 10-da saat 12-də Azərbaycan çalışdığı teatrda keçiriləcək.

Azərpaşa Zəfər oğlu Nemətov 1947-ci ildə Bakı şəhərində anadan olub.

O, uzun müddət Gənc Tamaşaçılar Teatrında fəaliyyət göstərmiş və yüzdən artıq tamaşaya quruluş vermiş rejissor Zəfər Nemətovun ailəsində dünyaya göz açıb.

Bülbül adına orta musiqi məktəbində, daha sonra Azərbaycan Dövlət Konservatoriyasında dünya şöhrətli bəstəkar Qara Qarayevin sinfində təhsil alıb. 1965-ci ildə isə Teatr İnstitutunun rejissorluq fakültəsinə daxil olub. 1972-ci ildən Gənc Tamaşaçılar Teatrında əvvəl rejissor assistenti, sonra quruluşçu rejissor işləyib. 1974–1977-ci illərdə Sankt-Peterburq teatrında fəaliyyət göstərib. 1977-ci ildə isə yenidən Bakıya qayıdaraq GTT-də rejissor və baş rejissor (1983–1990) işləyib.

Azərpaşa Nemətov 1990-cı il, aprel ayının 20-dən Azərbaycan Dövlət Akademik Milli Dram Teatrının quruluşçu rejissoru işləyib, 31 avqust 2015-ci ildən isə Azərbaycan Dövlət Akademik Milli Dram Teatrının bədii rəhbəri-baş rejissoru vəzifəsinə təyin edilib.

6 yanvar 2016-cı ildən etibarən, Azərbaycan Dövlət Akademik Milli Dram Teatrının həm də baş direktoru idi.

12 avqust 2022-ci ildə “Şərəf” ordeninə layiq görülüb.

Becan.az