Polkovnik: “Görək, beynəlxalq qurumlar əsirlikdə olan əsgərlərimizin haqlı müdafiəsinə qalxacaqlarmı...”
Siyasət
20:15
13.04.2023
1 140
“Öncədən Müdafiə Nazirliyinin Mətbuat Xidməti tərəfindən elan edilmişdi ki, iki nəfər Azərbaycan əsgəri Naxçıvan bölgəsində hava şəraiti pis olduğu üçün yolunu azaraq itkin düşüb və onların atarışı ilə bağlı müəyyən tədbirlər görülüb. Adətən sərhədlərə yaxın, yaxud dağlıq ərazilərdə bir-birinin qarşısında duran mövqelərə yaxın belə hallar olur. Bilirsiniz ki, dəfələrlə erməni hərbçiləri də, mülki şəxslər də hava şəraitinin pis olması ilə əlaqədar Azərbaycan tərəfə keçiblər. Hətta ərazilərimiz işğalda olan dövrdə də belə hallar tez-tez yaşanırdı.
Azərbaycan tərəfi həmişə olduğu kimi insanlıq dəyərlərindən irəli gələrək belə hallara çox diqqətlə yanaşıb, Konvensiyanın bütün beynəlxalq tələblərini yerinə yetirib. Əsirlərin qaytarılması prosesi də bunu göstərirdi. Beynəlxalq Qırmızı Xaç Komitəsi tərəfindən də erməni əsirlərdə zorakılıq əlamətləri olmadığı barədə rəsmi bəyanatlar verilirdi. Lakin biz yenə də itkin düşən hərbçimizə qarşı erməni vəhşiliyini, işgəncə verildiyini görürük. Bu, azmış kimi ermənilər əsgərlərimizə işgəncə edərək onları hətta belə ifadə verməyə məcbur edirdilər ki, guya bizim əsgərlər ermənilərin başını kəsiblər. Bu yolla tətbiq etdikləri işgəncənin üstünü örtmək üçün əsgərlərimizi əsir kimi yox, cinayətkar kimi qələmə vermək istəyirlər. Əlbəttə, artıq yayılan videomateriallar konkret faktlardır. Bir neçə videogörüntü yayılıb. Bəzi yerlərdən, hətta həmin videoları siliblər”.
Bu sözləri Pravda.az-a açıqlamasında ehtiyatda olan polkovnik Şair Ramaldanov deyib.
O, bildirib ki, bu gün həbçimizə işgəncə verilməsi ilə bağlı yayılan videolar beynəlxalq qurumlar tərəfindən diqqətə alınmalıdır:
“Düşünürəm, Azərbaycan dövləti bununla bağlı müəyyən işlər aparacaq. Çünki real faktlar var. Bu əməli törədənlərə qarşı cinayət işi qaldırılmalıdır. Beynəlxalq normaları, əsirlərlə davranış qaydalarını kobudcasına pozması ilə bağlı beynəlxalq qurumlar Ermənistanı məsuliyyətə cəlb etməli, Ermənistanı qınamalıdırlar. Ancaq ikili standartları müşahidə edən zaman beynəlxalq qurumların bu videogörüntülərə obyektiv yanaşacaqlarına inanmaqda çətinlik çəkirəm. Hər halda, erməni vəhşiliyini 30 il ərzində də görümüşük. Bu gün işğaldan azad olunmuş Azərbaycan ərazilərində, hətta tikililərin ermənilər tərəfindən darmadağın edilməsi ilə bağlı faktları bütün dünya görür, amma yenə də susur.
Ermənilərin xəmiri belə yoğrulub. Buna görə də onların nəticə çıxaracaqlarına, bundan sonra vəhşiliklərindən əl çəkəcəklərinə inanmıram. Gözləyək görək, beynəlxalq qurumlar bunu qınayacaqlarmı, Ermənistanı məsuliyyətə cəlb edəcəklərmi, əsirlikdə olan əsgərlərimizin haqlı müdafiəsinə qalxacaqlarmı...”.
Oxşar xəbərlər
{sape_links}