Pensiya və müavinətlər yenidən artırıla bilər

2023-cü ilin dövlət büdcəsinə yenidən baxılacaq.

Baş nazir Əli Əsədovun rəhbərliyi ilə keçirilən İqtisadi Şuranın iclasında bununla bağlı tapşırıqlar verilib.

Məsələyə münasibət bildirən millət vəkili Naqif Həmzəyev "Xəbər Ertəsi"nə deyib ki, dövlət büdcəsinə yenidən baxılması xüsusilə sosial sahələrə müsbət təsir edəcək.

Onun sözlərinə görə, vətəndaşlar da büdcəyə edilmiş dəyişiklikləri hiss edəcəklər.

İqtisadçı ekspert Rəşad Həsənov isə vurğulayıb ki, büdcəyə yenidən baxılması gözlənilən idi. İqtisadçı qeyd edib ki, dövlət büdcəsinə yenidən baxılarkən ilk növbədə sosial müavinət, təqaüd məsələlərində gəlirlərin yenidən dəyərləndirilməsinə ehtiyac var.

Ekspert deyib ki, məşğulluq tədbirlərinin planlanması və effektivliyin artırılması məqsədilə də əlavə vəsaitlər nəzərdə tutula bilər.