"Təkcə Ermənistanın güc strukturlarında yox, Azərbaycanda da Rusiyaya yaxın adamlar var" - ŞƏRH

“Nə zaman ki danışıqlarda müəyyən bir yol qət edirik, onda bu cür təxribatların şahidi oluruq”.

Bunu Bakupost.az -a açıqlamasında siyasi ekspert Azər Qasımlı bu gün Ermənistanın Azərbaycanla sərhəddə silahlı təxribatını şərh edərkən deyib.

Onun sözlərinə görə, Rusiyanın həm Ermənistana, həm Azərbaycana təsir imkanları genişdir:

“Açığı, hələ ki bir söz demək çətindir. Hələ tam bilmirik, hadisə necə baş verib. Müdafiə Nazirliyi açıqlama verib, amma bu, yetərli deyil. Burada diqqət cəlb edən məqam odur ki, Ermənistan-Azərbaycan danışıqlarında həmişə müəyyən mənada hansısa bir ortaq məxrəcə gəlinəndə hər zaman bu tip təxribatlar baş verir, atəşkəs pozulur. Ermənistan ordusunda Rusiyaya bağlı qüvvələr var. Bunu onların vasitəsilə edə bilərlər. Təkcə Ermənistanın güc strukturlarında yox, Azərbaycanda da Rusiyaya yaxın adamlar var. Ona görə də Rusiya istədiyi zaman bu riçaqlardan istifadə edə bilir”.


Azər Qasımlı qeyd edib ki, Azərbaycan siyasi elitası ilə Rusiya iqtidarı arasında heç bir problem yoxdur:

“Bəzi analitiklər deyir ki, Rusiya ilə Azərbaycan arasında münasibətlər yaxşı deyil, Azərbaycan Rusiyadan tamamilə ayrılmaq istəyir, Rusiya Ermənistana yardım edir və s. Belə bir şey yoxdur. Mən Azərbaycanın Rusiyaya yaxınlaşmasını görürəm, nəinki əksini. Ermənistanın isə əksinə, Rusiyadan daha da qopmasının şahidi oluruq. Azərbaycan tərəfi daha prinsipial məsələlərdə Rusiyanın tərəfini saxlayır və ya prosesdən kənarda durmağa çalışır”.