Avropa mətbuatı Ərdoğanı favorit hesab edir

Türkiyədə mayın 28-də keçiriləcək prezident seçkilərinin ikinci turu xarici mətbuatda geniş müzakirə olunur.

"Akşam" xəbər verir ki, dünya mətbuatı Rəcəb Tayyib Ərdoğanın seçkilərin ikinci turunun favoriti olduğunu yazır.

Xüsusən İsveçrə mətbuatında seçkilərin ikici turu haqqında xəbərlərdə "Cumhur" İttifaqının namizədinin qalib gələcəyi bildirilir. İsveçrənin rəsmi dövlət televiziyası SRF də eyni fikri paylaşıb. Başqa bir xəbərdə isə bunun məyus müxalifəti “depressiyaya saldığı” barədə şərhlər verilib. Həmçinin seçkilərin demokratik keçirildiyi vurğulanıb.

“Blick” qəzeti də “Ərdoğan qələbəyə gözlənildiyindən çox yaxındır” başlığı ilə xəbər paylaşıb. Xəbərdə "Ərdoğan ilk turda liderdir və yəqin ki, iki həftə sonra ikinci turda qalib gələcək" ifadələri yer alıb.

Bundan başqa, Fransa və Almaniya qəzetlərində də ilk turu birinciliklə başa vuran prezident Ərdoğanın ikinci turun da favorit namizədi olduğu qeyd edilib. Xəbərdə prezident Ərdoğanın bölgədəki böhranlara, son vaxtlar baş verən böyük zəlzələlərə və iqtisadi çətinliklərə baxmayaraq, uğur qazandığı və seçicilərin ona güvənməyə davam etdiyi bildirilib.

Fransız mətbuatında Ərdoğanın psixoloji üstünlüyü ələ keçirdiyi bildirilib. Qeyd edilib ki, Ərdoğan ikinci tur üçün güclü mövqeyə sahibdir. Lakin bu yenə də rəqabətli bir yarış olacaq.