14 iyun - "Son zəng" günü!

Bu gün Azərbaycanda “Son zəng” günü qeyd edilir. 15 sentyabrda başlayan 2022-2023-cü tədris ili 14 iyunda başa çatır.

Elm və Təhsil Nazirliyi “Son zəng”lə bağlı məktəblərə müvafiq tapşırıqlar verib. Tədbir hər bir ümumtəhsil müəssisəsinin həyətyanı sahəsində, həyətyanı sahəsi olmayan ümumtəhsil müəssisələrinin idman və ya akt zallarında təşkil olunmalıdır.

“Son zəng” tədbirində valideyn komitələri, valideyn-müəllim assosiasiyaları və ictimaiyyətin nümayəndələri iştirak edə bilərlər. “Son zəng” müddətində şagirdlərin təhlükəsizliyinin təmin olunması istiqamətində zəruri tədbirlər görülür.

2022-2023-cü tədris ilində ümumi təhsilin tam orta təhsil səviyyəsini Elm və Təhsil Nazirliyinin strukturuna daxil olan ümumtəhsil müəssisələrində 100084, digər qurumların tabeliyində olan ümumtəhsil müəssisələrində 1104, özəl ümumtəhsil müəssisələrində 727 nəfər məzun olacaq.

2022-2023-cü tədris ilində Bakı Şəhəri üzrə Təhsil İdarəsinin (BŞTİ) tabeliyindəki ümumtəhsil müəssisələrinin IX siniflərini 40 016, XI siniflərini 26 453, XII siniflərini isə (əyani-qiyabi tam orta məktəb və qiyabi sinifləri) 144 nəfər bitirir.

Həmçinin paytaxtda 45 108 nəfər I sinfi başa vurur. Cari tədris ilində BŞTİ-nin tabeliyindəki ümumtəhsil məktəblərində 482 132 şagird təhsil alıb.

BŞTİ-nin tabeliyindəki ümumitəhsil məktəblərində ümumilikdə, 28 410 müəllim fəaliyyət göstərir.

2022-2023-cü tədris ilində paytaxt üzrə 282 ümumtəhsil məktəbində fəaliyyət göstərən 976 məktəbəhazırlıq qrupuna 22 902 uşaq cəlb olunub.

Becan.az