Abşeronla bağlı dəhşətli faktlar: Bunu utandıqlarından etiraf edə bilmirlər...
Manşet / Araşdırma
14:54
20.08.2023
1 778
Tanınmış araşdırmaçı Allahverdi Aydın Abşeronla bağlı dəhşətli faktlar açıqlayıb. Onun sözlərinə görə Abşeron yarımadasının ərazisi (2110 kv. km) Azərbaycanın ümumi ərazisinin (86,6 min kv. km) 2,4%-ni təşkil edir.
O, Abşeronun ölkə ərazisinin bu qədər kiçik bir hissəsini tutmasına baxmayaraq, əhalisinin yarıdan çoxunun bu zonada yaşadığını qeyd edib:
“Ölkə əhalisinin 50%-dən çoxu Abşeronda cəmləşib. Bakı, Xırdalan və Sumqayıt faktiki olaraq birləşib və Abşeron meqapolisinə çevrilib. Dövlət Statistika Komitəsi utandığından bunu birbaşa etiraf eləyə bilməsə də, dolayısı yolla bunu təsdiqləyir.
Məsələn, DSK-nin son məlumatına görə ölkə üzrə:
- Pərakəndə ticarət dövriyyəsinin 63%-i,
- Sərnişin daşımalarının 52%-i,
- İnformasiya və rabitə xidmətlərinin 96%-i,
- Ödənişli xidmətlərin – 66%-i,
- İaşə dövriyyəsinin 72%-i,
- Elektrik enerjisi istehlakının (əhali üzrə) 52%-i
Abşeron meqapolisinin payına düşüb.
Dünyanın heç bir yerində belə analogiya yoxdur. Böyük ehtimalla heç bir normal ölkədə əhalinin yarıdan çoxu ölkə ərazisinin 2,4%-də cəmləşməyib.
Son 20 ildə regionların sosial-iqtisadi inkişafı adı ilə 4 Dövlət Proqramı icra olunub. Əvvəllər ümid edirdik ki, regionların sosial-iqtisadi inkişafı ilə bağlı icra olunan Dövlət Proqramları bu anormal urbanizasiya probleminin qarşısını alar. Amma nəticəsi olmadı.
İndi də ümid edirik ki, məcburi köçkünlər öz yurdlarına dönəcək və bu problem qismən də olsa həll olunacaq”./Yenisabah.az
Oxşar xəbərlər
