"Biz döyüşürük, bəs baş nazirin oğlu hardadır?" - Qalmaqal

Ehtiyatda olan hərbçilər HƏMAS-a qarşı döyüşmək üçün xaricdən İsrailə qayıdan zaman Baş nazir Benyamin Netanyahunun oğlu Mayamidə qalıb. Bu səbəbdən, o, ciddi tənqid olunub.

Bakupost.az Daily Mail-ə istinadla xəbər verir ki, 32 yaşlı Yair Netanyahu ən azı aprel ayından - atası ona sosial mediada qızışdırıcı postlar dərc etməyi dayandırmağı tövsiyə etdikdən sonra Floridadadır. Qeyd edək ki, o, sosial şəbəkə hesabında paylaşımlarına görə böhtan ittihamı ilə dəfələrlə məhkəməyə verilib.

Qeyd edək ki, Yaxın Şərqdə müharibə başladıqdan sonra İsrail görünməmiş səfərbərlik elan edib - 360 000 ehtiyatda olan əsgər orduya çağırılıb. Onların çoxu İsrailə qayıtmaq üçün hər şeydən imtina edib, hətta, bal ayına getməyənlər də olub.

Lakin Yair Mayamidə qalıb və bu, bəzi əsgərləri qıcıqlandırıb. İsrailin şimal cəbhəsində xidmət edən könüllülərdən biri "The Times" qəzetinə deyib ki, “biz cəbhə xəttindəyik, Yair isə Mayami çimərliyində həyatdan həzz alır”.

Qəzza sərhədinə göndərilən başqa biri isə deyib:

"Mən işimin, normal həyatımın, ailəmin olduğu ABŞ-dan gəlmişəm. Bu kritik anda orada qalıb ölkəmi, xalqımı yalqız qoya bilməzdim. Baş nazirin oğlu haradadır? Niyə o İsraildə deyil?"

Qeyd edək ki, orta məktəbdə teatr təhsili alan Yair məcburi hərbi xidmətini başa vurub. Lakin, o, döyüşçü kimi yox, İDF-nin nümayəndəlik hissəsində çalışıb.

18 yaşı tamam olan israillilərin əksəriyyəti üçün hərbi xidmət məcburidir. Kişilər 32, qadınlar isə 24 ay xidmət etməlidirlər.

Bundan sonra onların əksəriyyəti fövqəladə hallar zamanı 40 yaşına, hətta, daha yuxarı yaşına qədər ehtiyatdan çağırıla bilər və müharibə zamanı nizami qoşunlarla bərabər döyüşməlidirlər.

"Ehtiyatda olan əsgərlər qeyri-döyüş şəraitində də xidmətə cəlb edilə bilərlər. Başqa sözlə, Yairin cəbhə təcrübəsinin olmaması onu məsuliyyətdən azad etmir", - deyə, xarici media qeyd edib.