Saakaşvilinin Əliyev və Paşinyana müraciəti

Gürcüstanın keçmiş prezidenti, Ukraynanın Odessa bölgəsinin sabiq qubernatoru Mixeil Saakaşvili Azərbaycan və Ermənistan rəhbərlərinə dinc və birgə yaşayış təklifli müraciət ünvanlayıb.

Bu barədə Turan.az saytı paylaşım edib.

Cənubi Qafqazın üç ölkəsindən birinin rəhbəri olmuş M.Saakaşvilinin fikrincə, hazırda Cənubi Qafqazda, xüsusən Azərbaycanın öz ərazisi - Naxçıvan ilə quru yolu ilə birbaşa əlaqəni təmin edə biləcək dəhlizlə əlaqədar, potensial hərbi qarşıdurma təhlükəsi var. Sabiq prezident hesab edir ki, Rusiya bu münaqişəni qızışdırmaqda maraqlıdır.

Müraciətdə daha sonra deyilir:

"Belə bir müharibə təkcə Azərbaycanın beynəlxalq nüfuzuna zərbə vurmayacaq, həm də Ermənistanda hökumətin dəyişməsinə gətirib çıxara bilər. Lakin bu məsələnin güc tətbiqini nəzərdə tutmayan alternativ həll yolları var.

Azərbaycan və Ermənistan rəhbərliyindən mümkün nümunə kimi Ukrayna və Moldova arasında mövcud olan razılaşmanı nəzərdən keçirməyi xahiş etmək istərdim. Bu iki ölkə bir-birinin sərhədini tanıyaraq, yaxşı qonşuluq münasibətləri saxlayırlar.

Ukraynanın Odessa şəhərindən Odessa bölgəsinin cənub hissəsinə çıxışa ehtiyacı olduğu zaman Moldova həvəslə Dnestryanıdan keçən yolu icarəyə verməyə razılaşıb. Keçmiş Odessa qubernatoru olaraq Ukraynanın Bessarabiya bölgəsinə getməli olduğum zaman Ukrayna sərhədçilərinin nəzarəti altında olan bu icarəyə götürülmüş yoldan (bu yolu mən təmir etmişdim) tez-tez istifadə etmişəm.

Moldova bu sazişdən ticari mənfəət əldə edir. Azərbaycan və Ermənistan arasındakı vəziyyətə buna bənzər həllin tətbiq edilməsi hər iki ölkə üçün sərfəli olardı. Ermənistan ticari və maliyyə üstünlükləri, habelə mühüm tranzit yollarına çıxış əldə edə bilərdi. Bundan başqa, Azərbaycan gələcəkdə Rusiya qoşunlarının iştirakı zərurətindən yayına bilərdi ki, bu da son nəticədə iki ölkə arasında dinc, birgə yaşayışa gətirib çıxarardı".