Yol polisinə "haran ağrıyır, rəis?" - dedi, cərimələndi

Naxçıvan şəhərində içkili halda Dövlət Yol Polisi (DYP) əməkdaşı ilə zarafatlaşan şəxs saxlanılıb.

"Qaynarinfo" xəbər verir ki, 1965-ci ildə Naxçıvan rayonu, Aşağı Uzunoba kəndində anadan olmuş Nihal restoranda yeyib-içdikdən sonra yol kənarında dayanan DYP əməkdaşına yaxınlaşaraq "haran ağrıyır, rəis?” sözünü işlədib. Daha sonra Nihal "komandir, üzr istəyirəm, sizi səhv salıb, zarafat etdim" - deyib.

DYP əməkdaşı "siz kimsiniz mənlə zarafat edirsiniz?” cavabını verib və hadisə yerinə PPX əməkdaşları çağırılıb.

Nihal saxlanılaraq barəsində İnzibati Xətalar Məcəlləsinin 510 və 535.1-ci maddələri ilə protokol tərtib edilərək, baxılması üçün məhkəməyə təqdim olunub.

Məhkəmənin qərarı ilə Nihal 150 manat məbləğində inzibati qaydada cərimə edilib.