Ukrayna sülhə məcbur ediləcək - Gizli razılaşma

ABŞ və Almaniya Ukraynanı birbaşa diplomatik təzyiq etmədən Rusiya ilə sülh danışıqlarına razı salmaq üçün strategiya hazırlayıb.

Xəbər verilir ki, bu barədə "Bild"-ə Almaniya hökumət dairələrindəki mənbələr məlumat verib.

İddia olunur ki, müttəfiqlər Ukraynanı “strateji baxımdan sərfəli danışıqlar mövqeyinə” gətirəm istəyirlər. Bu mövqedən Kiyev Moskva ilə öz “suverenliyi və ərazi bütövlüyü” ilə bağlı danışıqlar aparmalıdır.

“Ağ Ev və Olaf Şoltsun ofisi bu məsələni koordinasiya edir,” - Almaniya hökumət rəsmisi jurnalistlərə bildirib.

Vaşinqton və Berlinin Ukrayna Prezidenti Vladimir Zelenskini birbaşa olaraq danışıqlara başlamaq zərurətinə inandırmaq niyyətində olmadığı vurğulanır. Ukraynaya iki əsas silah tədarükçüsü kimi ABŞ və Almaniya məqsədlərinə çatmaq üçün bu xüsusi rıçaqdan istifadə etmək qərarına gəliblər.

Mənbələr bildirir ki, Ukrayna silahlarla o həddə təmin olunacaq ki, indiki cəbhəni saxlaya bilsin, lakin Rusiyanın işğal etdiyi əraziləri azad etmək imkanına malik olmasın.

"Zelenski özü başa düşməlidir ki, vəziyyət belə davam edə bilməz. Kənardan heç bir təhrik olmadan, o, öz istəyi ilə xalqına müraciət etməli və danışıqların zəruri olduğunu izah etməlidir", - Almaniya hökumətindəki insayderlərdən biri bildirib.